ABŞ Dövlət Departamenti Dağlıq Qarabağda keçirilmiş referendumla bağlı bəyanat verib. Bu barədə «Amerikanın Səsi» radiosuna Departamentin sözçüsü Edqar Vaskez bildirib: «Birləşmiş Ştatlar Azərbaycanın ərazi bütövlüyünü dəstəkləyir. Biz Dağlıq Qarabağı müstəqil dövlət kimi tanımırıq. Biz təəssüf edirik ki, Dağlıq Qarabağda rəsmilər regionun müstəqilliyini təsbit edən konstitusiya layihəsi üzrə referendum keçiriblər».
Cənab Vaskez bildirib ki, ABŞ ATƏT-in Minsk qrupunun həmsədri kimi Dağlıq Qarabağ münaqişəsinin sülh yolu ilə, danışıqlar vasitəsilə nizamlanmasının tərəfdarıdır: «Dağlıq Qarabağın gələcək statusu sülh prosesində Ermənistan və Azərbaycan arasında danışıqlarda müzakirə olunan məsələdir. Referendumun prosesi qabaqlamasına baxmayaraq, biz onun nəticələrini tanımırıq. Bununla belə, biz nəticələrin danışıqlarda yaranmış perspektivlərə mane olacağını düşünmürük».