Milli Televiziya və Radio Şurasının dekabrın 8-də keçirdiyi iclasında «Azadlıq» və «Amerikanın səsi» radiolarının gələn il yanvarın 1-dən 101.7 FM tezliyində yayımlanması haqqında qərar qəbul edilib.
Bundan başqa, həmin iclasda «Avropa+Bakı» radiosunun və Zaqatala rayonunda yayımlanan «Aygün» TV-nin fəaliyyət üçün xüsusi razılıq (lisenziya) müddətinin uzadılmasıyla bağlı məsələ də müzakirə olunub. Şuranın qərarı ilə «Avropa+Bakı» radiosuna musiqi radiosu kimi altı il müddətinə yayım üçün xüsusi razılıq verilib. Şuranın yaydığı məlumata görə, müzakirəyə təqdim etdiyi sənədlərin qaydasında olmadığı nəzərə alınaraq «Aygün» TV-yə razılıq verilməsi məsələsinə növbəti iclasda baxılması qərara alınıb.