Müasir dövrdə hansısa mətbu orqanın bağlanmasının və ya ya fəaliyyətinin məhdudlaşdırılmasının qeyri-mümkün olduğunu deyən İlham Əliyev hüquqi məsələlərə siyasi rəng verməyin əleyhinə olduğunu bildirib.
Elə həmin gün ABŞ-ın Azərbaycandakı səfiri Ann Ders də hökuməti ANS telekanalının yayımını bərpa etməyə çağırıb. Bakıda jurnalistlərin suallarını cavablandırarkən səfir bildirib ki, aparıcı müstəqil yayım vasitəsinin fəaliyyətinin dayandırılması mətbuat azadlığına böyük bir zərbədir və bu, xüsusən də noyabrın 24-də məhkəmə qərarından sonra «Azadlıq» qəzeti və AXCP-nin öz ofisindən çıxarılması ilə eyni vaxta düşüb. Xanım Dersin sözlərinə görə, ABŞ hökuməti Azərbaycanın demokratiya və mətbuat azadlığı ilə bağlı öhdəliklərini nəzərə alaraq, ATƏT, Avropa Şurası və bütün beynəlxalq təşkilatlarla birlikdə Bakını bu qərara yenidən baxmağa çağırır.
Milli Televiziya və Radio Şurasının noyabrın 24-də çıxardığı qərarla ANS TV və ANS ÇM radiosunun fəaliyyəti dayandırılıb. ANS-dən «Azadlıq» radiosuna verilən məlumata görə, televiziya rəhbərliyi prezidentin çıxışından sonra qeyd olunan iradların aradan qaldırılması ilə bağlı müzakirələr üçün yenidən Milli Televiziya və Radio Şurasına müraciət edib. Hələlik Şuranın bu müraciətə cavabı bəlli deyil, amma noyabrın 30-da tezlik məsələsinə baxılacaq.