Azərbaycan Xalq Cəbhəsi Partiyası Keşlə qəsəbəsində deyil, Demokrat Partiyasının qərargahında məskunlaşıb, «Turan» İnformasiya Agentliyi isə Binəqədi qəsəbəsindəki yeni ünvana getməyərək, Xaqani küçəsində ofis kirayələməyə qərar verib.
«Azadlıq» qəzetinin direktoru Azər Əhmədov deyir ki, məhkəmənin qərarı ilə onlara «Azərbaycan» nəşriyyatında ayrılmış otaqlarda başqa qəzetlər fəaliyyət göstərirlər. Nəşriyyat onlardan qəzetlərin çıxarılması üçün təxminən iki həftə vaxt istəyib. Buna görə də qəzet müvəqqəti olaraq «Yeni Müsavat» qəzetinin kompüter mərkəzində işləməli olacaq.
«Azərbaycan» nəşriyyatının baş direktor müavini Allahverdi Məmmədov isə bildirir ki, bazar ertəsindən həmin qəzetlər «Azadlıq»a ayrılmış yerdən çıxarılacaqlar.
Dövlət Əmlakının İdarə Edilməsi üzrə Dövlət Komitəsi «Azadlıq» qəzetinə qarşı 30 min yeni manat icarə haqqının ödənilməsi və yerləşdiyi Xəqani-33 ünvanından çıxarılmasına dair məhkəmə iddiası qaldırmışdı. Qəzet isə bu binanın onlara əvəzsiz və müddətsiz verildiyini bildirirdi.
1 saylı İqtisad Məhkəməsi tərəflərə barışmaq üçün bir həftə möhlət versə də, noyabrın 24-də həmin binada yerləşən təşkilatların çıxarılmasına qərar verib. Qərar dərhal icraya yönəldilərək bina boşaldılıb.
