«Sərhədsiz Reportyorlar» bildirir ki, mətbuatın sıxışdırılması kampaniyası son bir neçə həftədə güclənib: «Oktyabrda jurnalist və yazıçı Sakit Zahidov narkotik maddədən istifadə ittihamıyla üç il müddətinə məhkum edilib. «BBC», «Azadlıq» və «Amerikanın səsi» kimi xarici radiolar öz verilişlərini yerli televiziya və radiolar vasitəsilə yaymaq imkanlarından məhrum olmaq hədəsi ilə üzləşiblər. Öz yerlərindən çıxarılmaq hədəsi ilə isə aparıcı müxalifət qəzeti olan «Azadlıq», müstəqil «Turan» İnformasiya Agentliyi üzləşib. Onların sıxışdırılmasına qarşı keçirilən aksiyalar zorakılıqla dağıdılıb. Qənimət Zahidov və bir neçə qəzet redaktoru noybarın 9-dan aclıq aksiyasına başlayıb».
Prezident Aparatının ictimai-siyasi şöbəsinin müdiri Əli Həsənov isə bildirib ki, hakimiyyət «Azadlıq» qəzeti və Xəqani-33 ünvanında yerləşən digər KİV və təşkilatlar üçün yer ayıracaq. Cənab Həsənov onu da deyib ki, bu, mülki-hüquq məsələsidir və tərəflərin bir-birinə qarşı iddialarına məhkəmədə baxılacaq.
Bundan əvvəl Dövlət Əmlakının İdarə Edilməsi üzrə Dövlət Komitəsi AXCP, «Azadlıq» qəzeti və «Turan» İnformasiya Agentliyinə şəhərin ayrı-ayrı hissələrində yerlər təklif etmişdi.
Dövlət Əmlakının İdarə Edilməsi üzrə Dövlət Komitəsinin «Azadlıq» qəzetinin yerləşdiyi ünvandan çıxarılması iddiasına noyabrın 24-də 1 saylı Yerli İqtisad Məhkəməsində baxılacaq.