Sentyabrın 15-dən Şəkidə «Üç məkan» II Beynəlxalq Teatr Festivalı start götürür.
Mədəniyyət və Turizm Nazirliyindən AzadlıqRadiosuna verilən xəbərə görə, festivala 12 teatr-5 yerli, 7 xarici ölkə teatrı qatılıb.
Akademik Milli Dram teatrı, Gəncə Dövlət Dram Teatrı, Dövlət Rus Dram Teatrı, Dövlət Kukla Teatrı, Şəki Dövlət Dram Teatrı, BƏƏ-nin «Əl-Əhli» Dubay Teatrı, İranın «Neğab» Teatrı, Ukraynanın «Prekrasnıye Tsvetı» Teatrı, Rusiyanın «Trikster» Teatrı, Gürcüstanın Nodar Dumbadze adına Professional Dövlət Gənclər Teatrı, Türkiyə Cümhuriyyətinin İstanbul Bələdiyyəsi Şəhər Teatrı sentyabrın 15-dən 23-dək ölkənin müxtəlif məkanlarında tamaşa göstərəcəklər.
Akademik Milli Dram Teatrı Şəkidə «Ölülər» tamaşası ilə çıxış edəcək.
İstanbul Bələdiyyəsi Şəhər Teatrı sentyabrın 22-də və 23-də Xalq yazıçısı Elçinin «Şekspir» əsərini Dövlət Musiqili Teatrında təqdim edəcək.
Tamaşanın quruluşçu-rejissoru Türkiyədə yaşayan Məlahət Abbasova, quruluşçu-rəssamı Ayhan Doğandır.
Böyük tamaşaçı toplayan və Türkiyənin teatr ictimaiyyəti tərəfindən yüksək dəyərləndirilən «Şekspir» tamaşası «Yeni Teatro Dərgisi və Başarı ödülü» mükafatına layiq görülüb.
Səhnə əsərində rol alan 5 aktyor «İlin ən yaxşı aktyoru» seçilib.
«Üç məkan» II Beynəlxalq Teatr Festivalısentyabrın 24-də başa çatacaq.
