Keçid linkləri

2016, 26 Sentyabr, Bazar ertəsi, Bakı vaxtı 05:56

Dəbdən düşüb məktub yazmaq. Zəng eləsən, sevinərəm.


Şair Kəramət.

Şair Kəramət.

-

Kəramət

Sən gəlməlisən

Addımların səsinə

Atılmalıyam indi...

İndicə gəlməlisən

Əlində çamadanın.

Dayanıb sakit-sakit

Gözümə baxmalısan.

Birotaqlı mənzilin

Qocalan divarını

uçurub yıxmalısan,

Təyyarədən enməli,

Qatardan düşməlisən,

Ya yerdən çıxmalısan,

Ya göydən düşməlisən.

Qanunları, adətləri soyunub,

Dünyanın o başından

Adamı qışqıra-qışqıra

Qolunu açmalısan,

Üstümə qaçmalısan...

Belə zalımlıq olmaz,

Bu qədər gözləyəni

Gözlətməzlər bu qədər.

Adamlar arasında

Gizlətməzlər bu qədər

Axı, sən gəlməlisən,

Axı...

Sən

Gəl-mə-li-sən...

Müşküllərin müşkülü

Təzə ağaclar əkərdim

Barını yeyən ölməz,

Təzə torpaq hardan alım?

Ev tikərdim,

Qapısından keçənlərin dərdi olmaz

Bu daşlar dünya daşları.

Nəğmələr oxuyardım,

Sirli-sehirli nəğmələr,

(İlahi! O necə nəğmələrdi?)

Təzə sözlər tapammadım.

Təzə ağac, təzə nəğmə, təzə ev,

Ya yerdən çıx, ya göydən en, təzə adam!

Şər qarışanda oxunan sözlər

Məhəmməd Hadiyə

1

Yenə cədvəl üzrə qatarlar gedir

Vağzal da küylüdür bazarlar sayaq.

Bu üzü kədərə dartınan şeir.

Hadinin qəbrini gəzib tapacaq

Bəxt allah səbriydi, qırılar dərin,

Bilirdi vaxtın da yadından çıxıb.

Müsəlman ağlına oxşar illərin,

Başında həmişə ildırım çıxıb.

Şeirə sığındı, sözə qısıldı,

O da hamı kimi sabahı qovdu.

Bir qucaq xəzəli payız adından

Diz çöküb, şeirinin üstünə qoydum.

2

Əlləri piştaxtası

Əlləri arxasında

Şeir satırdı Hadi.

Hadinin dörd əli vardı:

İkisiylə şeir satırdı,

İkisiylə üzünü tuturdu.

Məktub

Səndən məktub gözləmirəm,

Dəbdən düşüb məktub yazmaq.

Zəng eləsən, sevinərəm.

(Telefonum yoxdur ancaq...).

Leyli də məktub yazıb

Sevgidən ölən varmış

Bir qızın həsrətiylə

Bir oğlan şair olarmış.

Bəlkə hərdən xatırlayıb

Məni görürsən yuxuda?

Xatirəni lentə yazdır,

Göndər mənə,

Filmə baxım özüm haqda.

Dəbdən düşür məktub yazmaq,

Poçtalyonun çatası boş.

Sonra səni düşünməyə,

Heç vaxtım da qalmayacaq

Adın çıxacaq yaddan,

Adın “bir qız” olacaq.

“Kim isə” adsız, ünvansız,

Yuxulara gələcək.

Sonra... sonra... sonralar...

Sonranı sonra bilərsən.

Rastlaşsaq, pıçıldaram:

“Sən mənə tanış gəlirsən”.

Şükür, bu xatirəyə,

Bu yuxuya min şükür.

Günün bütün mövzuları

XS
SM
MD
LG