ABŞ prezidenti Barack Obama və Rusiya dövlət başçısı Vladimir Putin arasında telefon danışığı olub.
Telefon danışığında Dağlıq Qarabağ, Suriya və Ukrayna məsələlərinin müzakirə edildiyi bildirilir.
«Amerikanın Səsi»nin Ağ Evdən əldə etdiyi məlumata görə, Barack Obama telefon danışığı zamanı Vladimir Putin-in ötən ayın 20-də Azərbaycan və Ermənistan prezidentləri ilə Dağlıq Qarabağ münaqişəsinin həlli səylərinə dair görüşünü gündəmə gətirib.
Xəbərdə qeyd edilir ki, Obama Putin-ə Dağlıq Qarabağ münaqişəsinin hərtərəfli həll yolunun tapılmasından ötrü ATƏT-in Minsk qrupunun həmsədrləri olaraq Rusiya və Fransa ilə birlikdə səylərini artırmağa hazır olduğunu bildirib.
Qarabağ cəbhəsində aprelin 2-dən 5-dək hərbi əməliyyatlarda hər iki tərəfdən onlarla hərbçi həlak olub. Gərginliyi aradan qaldırmaqdan ötrü Qarabağ münaqişəsinin tənzimlənməsində vasitəçi olan ATƏT-in Minsk qrupu həmsədrlərinin təşəbbüsü ilə mayın 16-da Vyanada Azərbaycan və Ermənistan prezidentlərinin görüşü keçirilib. Görüşdən sonra ATƏT-in Minsk qrupu həmsədrlərinin yaydığı bəyanatda qeyd edilib ki, prezidentlər sülh danışıqlarına bir daha sadiq olduqlarını bildiriblər.
İyunun 20-də isə Azərbaycan və Ermənistan dövlət başçıları Rusiya prezidenti Vladimir Putin-in iştirakı ilə Sankt-Peterburqda görüşərək danışıqları davam etdiriblər.
ATƏT-in Minsk qrupuna ABŞ, Fransa və Rusiya həmsədrlik edir.
Qarabağ münaqişəsi 1988-ci ildə başlayıb. Ermənistan silahlı qüvvələri Azərbaycanın Dağlıq Qarabağ bölgəsini və ona bitişik 7 rayonu işğal ediblər.
