-
AQŞİN EVRƏN
UŞAQLIQ İLLƏRİNDƏN BƏHS EDƏN ŞEİRLƏR
Uzaqlığın son gecəsi
Uşaqlığın son gecəsi beləcə başlamışdı
“Mama, mən heç nə eləmədim, o özü sevdi” demişdin
Gəl, sənə bir sirr də açım:
Dodağına toxunmaq üçün
sənin şirin çörəyindən gizlicə dişləmişdim
O vaxt sevgi sənin üçün “klas-klas” oyunuydu
Xar tut sürtüb dodağına boya çəkirdin hərdən
Siçan dişlərinlə də qolunu dişləyərək
Guya saat “düzəldirdin” nazik biləklərindən
Hörüklərini açdıqca taleyin dolaşırdı
Hə, elə danışmışkən qoy bunu da deyim e,
O pırpızbaş Ələddinlə, o cüllüt Ağayarla
Gecə-gündüz sənə görə küçədə dalaşırdım.
Onda sevgi bizim üçün Əlifba kitabıydı
Sən də məni müəlliməyə qısqanırdın – yadımda
Hər dərs eyni partada mənimlə oturardın
Niyə gəlib bu həyatda oturmadın yanımda?
“Gündəliyə” sabahın dərslərini bir-bir yaz
Uşaqlığım qayıdıb səni yenə sevəcək...
Çantanı tez hazırla, saçını da keçi yığ
Mən də səni ötürüm məktəbimizdən evəcən.
Həə, artıq uzaqlığın son gecəsi başlayıb
İndi evimdən getmir, qovuram... yenə getmir
O müqəddəs saçların... Allah əllərin
Ehh sən indi canımdakı azara baxma
Mən bir az yaxşıyam... indi qəlbim yox,
Əllərim ağrıyır, vallah, əllərim...
Tək taylı əlcək
O zəhrimar döyüşlərdən qayıdıb
Gəlib mənim yanağımda göz yaşımı qurutdun
Axı niyə o savaşdan gələndə
sağ əlini cəbhələrdə unutdun?
Həmin gecə yuxuda barmaqlarını tapdım,
tez götürüb gizlətdim yastığımın altında...
Sonra hara çıxıb getdi, bilmədim
Ata, mənim uşaqlığım sənin nəmli gözlərində itdi... bilmədin
Hə, elə doğum günümdə...
Qonşuda balıq bişəndə gözümdə öldü dəniz
Ata, sən ağladığın gün
elə bil dəryadan çıxıb üstümə gəldi dəniz
O vaxt həyat getməmişdi,
qapımız da sağ idi
“Şərikli çörək”iydi uşaqların yuxusu
Qardaşım ağlayanda bir “Sana” yağı üçün
Onda mən öyrəndim ki,
vahiməli üfunətdi ac uşağın burnuna gələn yemək qoxusu
Əlimi üşüdürdü cibində gəzdirdiyin o tək taylı əlcəyin
Yadımdan çıxmaz o gün
Heç özün də bilmirdin
anama necə verəsən aldığın çiçəkləri
Bilirəm sənin üçün evə əliboş gəlmək
biləyində daşıdığın zənbil qədər ağırdır
İndi məni nə bu həyat, nə də ölüm...
indi məni o vaxt vura bilmədiyin şillərin ağrıdır
İndi əlinə baxmağa bircə yol qalıb:
Şəkillər, şəkillər, qəşəng şəkillər
Gülümsə, ata, gülümsə,
Çəkirlər...