-
"Azərbaycan yazıçısı Əkrəm Əylislinin "Daş yuxular" romanında bəzi faktlar təhrif edilib" - Ermənistanda Naxçıvanın guya erməni torpağı olması haqda kitablar yazan erməni tarixçi Argam Ayvazyan erməni mətbuatında deyib.
"Daş yuxular" erməni dilində 2013-cü ildə nəşr edilib, indi erməni tarixçi deyir ki, o kitabda səhifələrin altına bir sıra qeydlər artırmaq lazım idi.
İspan dilində isə bu kitab bu il 6 mayda Argam Ayvazyanın önsözü və qeydləri ilə çıxıb, həmin önsözdə də erməni tarixçi deyir ki, bu kitabda bir çox faktlar təhrif edilib, azərbaycanlaşdırılıb:
"Əylisli bu kitabda haqqında danışdığı kütləvi qətlləri törədən əsas baiskar qismində Ermənistanı tərk edən azərbaycanlıları göstərir və onların hərəkətlərini keçmişdə olanlara görə qisas nümayişi kimi qələmə verir... Əylisli faktları təhrif edir. Bakıda və Sumqayıtda erməni qırğınları spontan olmamışdı, onları yerli hakimiyyətlər və Azərbaycan əhalisi təşkil etmişdi. 1905, 1918-1919-cu illərdə Bakıda, Şuşada, Naxçıvanda da, erməni-tatar davasında da belə olmuşdu”.
Erməni tarixçi deyib ki, "Daş yuxular"da Əylisli bir çox tarixi faktları, qəsəbə və abidələrin adlarını "azərbaycanlaşdırmaqla təhrif edib."
"Yazıçının erməni və azərbaycanlılar arasında dostluğu bərpa etmək istəməsi səmimi addımdır, amma tarixi də dəqiq göstərmək lazım idi" - erməni tarixçi Ayvazyan deyib.
