Keçid linkləri

2016, 11 Dekabr, bazar, Bakı vaxtı 02:26

-

Azər Əhmədoov

ŞEİRLƏR

QAYIDIŞ

Zoğalı-bənövşəyi bir gündə

mən gözlərimi yumub

əlliyəcən sayana qədər

o qaçıb mənim həyatımdan gizləndi

.

həyətdə çox axtardım onu

oyun belə necə bitə bilərdi?

.

barışmaq istəmədiyim

məntiqsiz sonluqların

ilkiydi

.

yoruldum

.

o bir də 30 il sonra qayıtdı həyatıma

nətəhərsən, canın-başın, soruşdu

burda “uçastkovı” işləyirəm

sənə dəyib-dolaşan yoxdur ki?

.

sonra əlini möhkəm kürəyimə vurub

dedi ki

heç nədən narahat olmayım

.

GÖZƏL GÜN

Səkkiz yaşındaykən

sentyabrın 30-unda

ilıq bir günortaçağı

öz-özünə

“bu nə gözəl gündür” dediyini

indi də xatırlayır

.

bir təpəliyin ətəyindəydi

səliqəsiz əkilmiş

üzümlüyün kənarında

nə önündə, nə arxasında

baxımlı bir mənzərə yoxdu

.

payız girdiyi üçün otlar da saralmış olmalıydı

yalnız çəyirtkələr arılar tənbəl-tənbəl uçuşa bilərdi

.

belə bir yerdə nə gözəldir

kənddən kiminsə kimisə çağırmasını eşitmək

amma uzaq olduğuyçün bu da mümkün deyildi

.

bəlkə yiyəsini də tanımadığı

bir at varmış yaxınlıqda

uzun çatıyla örüklənibmiş

.

ata yaxınlaşıb onu oxşamagı

bacarmazdı

amma atın qarpa-qarpa ot yeməsini

eşitmək də gözəldir

.

yoxsa bəlkə at yoxmuş

çəyirtkələrin arıların da səsi gəlmirmiş

baxsan nə sagında nə solunda heç nə görünmürmüş

.

bəlkə

günün günorta çağı

dəli kimi gəlib çıxdığı

bu tənha və uzaq məkanda

gözlərini şumlanmış torpağa dikərək

ətrafda sükutun səsini dinləyib ilk dəfə

uşaq olsa da qorxmayıb

bütün cəsarətini toplayaraq

“bu nə gözəl gündür”

pıçıldaya bilib öz-özünə

.

BİNAR SUALLAR

Cırcırama qəşəngdir yoxsa çəyirtkə?

dovşan qəşəngdir yoxsa dələ?

qarğa yaxşıdır yoxsa sağsağan?

.

təqaüdə çıxandan bəri

vaxt da tapmışdı

belə suallar haqqında düşünməyə

.

artıq qərara da gəlmişdi ki,

məsələn, sağsağan qarğadan yaxşıdır

.

o biri sualların da axırına çıxacaqdı mütləq

indi onu sonluq maraqlandırırdı

.

MARA NÖTER’Ə

Mara

mən bəlkə sənin yadında deyildim

heç indi də deyiləm

.

amma xatırlayıram

New Haven’də bir axşamüstü

səninlə uzun-uzadı

Nazim Hikmətdən danışandan sonra

yanaşı əyləşib

internetdə

uzun bir dəqiqə

Nazimin fotosuna baxdıq

.

bizi ilk dəfə görürmüş kimi

xəfifcə gülümsəyirdi fotodan

biz gözümüzü Nazimə zillədikcə

mənə elə göründü ki

onun dünyası ilə

bizim dünyamız arasındakı

sərhəd-ölüm-ekran

şəffaflaşdı şəffaflaşdı

axırda yox oldu

.

bilmirəm səndəmi belə hiss elədin

amma uzun dəqiqənin sonunda

çönüb bir-birimizə baxdığımızda

mən sənin də sifətində

heyrət gördüm

.

indi mən təkcə oturmuşam

kompüterin qarşısında

gözlərimi zilləmişəm ekrana

sənin şəklinə baxıram

Günün bütün mövzuları

XS
SM
MD
LG