Keçid linkləri

2016, 10 Dekabr, şənbə, Bakı vaxtı 20:57

-

Gənclərin OxuZalına göndərdikləri hekayələrdən

Rüzgar Mövsüm

KƏSƏCƏKLƏR

-Sabahın xeyir.

-Aqibətin xeyir, necəsən?

-Belə də, pis yatmışam. Gecə isti idi.

-Hə... bu gün də çox istidir.

-Gecə yenə atırdılar. Eşidirdin?

-Hə, həmişəki kimi. Bayaq dedilər kəndin girişindəki kiçik çinara da güllə dəyib, o uzun budaqlı var idi ha. Yazığın gövdəsindən səhərə kimi şirə axırdı.

-Yaxşı da? Onun anası da işğal vaxtı yanıb kül olmuşdu, deyəsən, top mərmisi düşmüşdü üstünə. İndi də yazığın özünə güllə dəydi, eh...

-Bədbəxt. Görəsən, erməni gülləsi dəyib, ya bizimkilərin?

-Nə fərqi var? Onu bilirəm ki, bütün gövdəsi deşilib, halı çox pisdir.

2033 yaşlı ağac. Dağlıq Qarabağın indi Sxtoraşen adlanan Şıx Dursun kəndi

2033 yaşlı ağac. Dağlıq Qarabağın indi Sxtoraşen adlanan Şıx Dursun kəndi

-Ay Allah, onun nə yaşı var ki?

-Elədir, hə. Buralarda sonuncu müharibə başlayanda o, lap balaca idi.

-Doğrudan? Mən o vaxt heç yox idim, deyirlər, yaman dəhşətli olub.

-Hə, düz deyirlər, bəzi şeylər mənim yadıma gəlir; məndən biraz aralı tut ağacının budağından düz 6 adam asmışdılar, hətta 7-cini asanda böyük budağı sınmışdı da.

-Vay, vay, yazıqlar. Gör indi tut nə qədər əziyyət çəkib.

-Hə, ölənə qədər yadına salıb ağlayırdı.

-Yazıq.

-Yaxşı, səncə, bu işlərin axırı necə olacaq? Deyirsən torpaqları sülhlə qaytaracaqlar? Ya müharibə olacaq?

-Vallah nə deyim, eşitdiyimə görə aradabir danışıqlar gedir, güya ki, haçansa qaytaracaqlar.

-Hm? Amma qaytarsalar, işimiz bitdi.

-Niyə? Nəyə görə?

-Azərbaycan tərəfdə yaşayan bir tanış şam ağacı var, arada mənə küləklərlə xəbər göndərir. Deyir ki, Azərbaycanda ağacları kəsib yerinə mənasız obyektlər tikirlər, nə bilim mərmərdən park-zad salırlar. Bunlar cəhənnəmə, yerli ağacları kəsib, yerinə Afrikadan, Amerikadan ağac gətirirlər ki, bəs belə daha gözəldir.

-Aaaa, məgər onlar bizim torpaqda yaşaya bilirlər ki?

-Yox da, onlar da yazıqlar bir müddət sonra quruyurlar, ölürlər.

-Dəhşət! Bəs xalq bunun qarşısını almaq üçün heç nə eləmir? Niyə qoyurlar ki, ağacları qırsınlar?

-Qəribə ağacsan e, millət nəyisə fikirləşsəydi, 20 ildən artıq içi biz qarışıq bu torpaqları düşmən tapdağında saxlayardı? Bu torpaqlarda müharibə olardı?

-Hm, o da düzdü...

-Odur ki, elə belə yaxşıdır, çünki o tərəfdəkilərin əlinə düşsək...

-Nə olacaq ki?

-Bizi də kəsəcəklər.

Günün bütün mövzuları

Şərhləri göstər

XS
SM
MD
LG