Keçid linkləri

logo-print
2016, 06 Dekabr, çərşənbə axşamı, Bakı vaxtı 07:05

- Nərdivan var küçəmizdən cənnətə

Amin Mehdi

Şeirlər

***

İndi

Bakıda kirayə qaldığım evə,

Yeni məhləmizə,

Qonşulara,

Həyətdəki insanlara öyrəşirəm

Və öyrəşirəm

Divarların qollarında

Özüm üçün darıxmağa.

Qapıların səssizliyində

Barmaqlarının sükutuna,

Pəncərənin Günəş döyən yanlarından

Qaranlığa qaçmağa,

Şəkildəki gözlərində

Darıxmağa öyrəşirəm.

Məhəccər önündə kitab, tütün qutum

Və isti çayımdan aldığım

Hər qurtuma,

Pəncərədən mənə boylanan

Yad insanlara,

Güzgüdəki məndən uzaqlara

Addım-addım yaxınlaşıb

Öyrəşirəm.

İndi əvvəllərə baxanda

Daha tez-tez yoruluram

Sıxılıram özümdən.

Bir nəfərlik təkliyimi yaşayıram

9-cu mərtəbədə.

Kafkanı, Sartrı oxuduqca

Müqəddəs sayıram tənhalığı-kədəri.

İndi həm də, əsmər qadınım.

Yoxluğuna öyrəşirəm.

Heç barışmadığım yoxluğuna.

***

Yaman darıxmışam sənin səsinçün.

Bu ölkə bəs etmir xəyallarıma.

Yollara düzüblər min cürə nişan.

Bir səni göstərən çıxmır qarşıma.

Mən sənə güvənib yelkən açmışam.

Qəm ümmanında itirmişəm hədəfi.

Başqa sevdalara Günəş olanda.

Bir dəfə olmadın dəniz fənərim.

Qollarım qırılıb düşüb yanıma.

Daha qucaqlamıram heç özümü də.

Dünən tənbeh etdim barmaqlarımı.

Daha sığal çəkmirəm şəkillərinə.

Nərdivan var küçəmizdən cənnətə.

Kimdən soruşursan cənnətə gedir.

Bir mən yarımçığam deyən şəhərdə.

Ağlım bədənimdən rədd olub gedir.

Ehhh!

Hardan biləsən nə təhər darıxıram mən.

Adam özü üçün darıxa bilmir.

Darıxmaq:

Yığıb bədənini bir çamadana.

Getmək istəsən də gedilə bilmir.

***

Səkini basıbdı tozlu ümidlər.

Süpürür oranı bükülmüş qoca.

Heç kömək eləmir köhnə taksilər.

Gedib qovuşmağa yerin yoxdursa.

Arzular, xəyallar uzaqlardadır.

Gündə bir yol çəkib hamarlayırlar.

Hansı yolun uzağa apardığına.

Elə yolçəkənlər çaş-baş qalırlar.

Kosmik tənhalığa çarə axtarır.

Dünyada yığışıb bütün adamlar.

Burdan doğmaları eşitmirəm mən.

Bunlar kainata mesaj atırlar.

Günün bütün mövzuları

Şərhləri göstər

XS
SM
MD
LG