- Rasət Pirisoyu
DAVA
(İntihar etmiş 12 yaşlı məktəbli İsmət Əsədovun xatirəsinə,
yaxud Suriyadıkı davanın anatomiyası haqqında poema)
Əslində,
Suriyadakı bu dava,
indiki kimi
böyük dava deyildi,
bapbalaca bir davaydı -
Bu bapbalaca davanı
bapbalaca
bir uşaq salmışdı.
Əhvalat belə olmuşdu;
Yepyekə,
heyvərə bir kişi
bir uşağın
əlindən
qoğalını almışdı,
Uşaq əvvəl ağlamışdı,
Bapbalaca əlləriylə
kişinin
heyvərə
ayaqlarından tutub,
saxlamışdı.
Yepyekə kişi
heyvərə ayağını
uşağın
əllərindən çəkmişdi,
uşaq ağzı üstə
yerə çökmüşdü,
ağzı - burnu
qanamışdı uşağın
ağlaya-ağlaya
qalxımışdı yerdən uşaq,
tozun - torpağın içindən
əlinə
yekə bir daş
almışdı birdən uşaq.
Yepyekə
heyvərə kişi
-a.. aa… a! -
eləyincə,
uşaq vurub yarmışdı
kişinin başını,
o boyda
zırpı kişi
itirmişdi huşunu…
Sonrasını
yaxşı xatırlamıram,
bilmirəm
yer üzündə
çaylarımı qurumuşudu,
dağlarmı yıxılmışdı,
işıqlarmı sönmüşdü,
Bu bapbalaca davanın
üfüqlərində
yepyekə,
laaappp yekə
kişilər görünmüşdü,
Bu yekə kişilərin
ağıllarında çoxdandı
bir yekə dava salmaq
havası vardı,
hər birinin
çiyinləri üstündə
illərlə dərd yığılan
qazana dönmüş
qafası vardı,
Birinin dərdi
yağlı yemək dərdi idi,
birinin dərdi yavan,
biri qoca olmaq istəyirdi,
biri cavan,
birini
mister Con qızışdırmışdı,
birini tovariş İvan,
Xülaseyi- kəlam,
Hərə öz dərdini götürüb,
girmişdi
bapbalaca uşaqla,
yepyekə
heyvərə kişinin
davasının içinə…
Birini bu demişdi,
birini o,
sonra bu deyişmədən
pay düşmüşdü
yoldan keçənə,
küçədən keçənlər
yavaş - yavaş
ayaq saxlamışdılar,
bəziləri hətta
- azadlıq! - deyib
bağıraraq
yolu bağalamışdılar,
adamlar
biri - birinə daraşmışdı.
Ən nəhayət,
bu dava- dalaşa
gözəlim
polis qarışmışdı,
şivən düşmüşdü…
Birinin başı yarılmışdı,
birinin qaşı,
birinin
barmağındakı ağrı böyümüşdü,
birinin qarnındakı…
Aləm dəymişdi biri - birinə,
Qan axmağa başlamışdı
su yerinə…
Uşaq yaddan çıxmışdı,
qoğal yaddan çıxmışdı,
yepyekə
heyvərə kişi
yaddan çıxmışdı,
Beləliklə,
Suriya üç gün üç gecə
oda girmişdi,
oddan çıxmışdı,
sonra bu üç gün
üç ay olmuşdu,
üç ay üç il…
Əvvəl
söyüş səsləri eşidilmişdi,
sonra sillə,
sonra kəllə,
sonra güllə,
Tank tankın üstünə yerimişdi,
Təyyarə təyyərənin,
İndi
Suriyada
bir dəli - divanə sualı var
hərənin:
«bu davanı kim saldı?»
İndi heç kəsin
yadına düşümür ki,
Bu dava əvvəl
Bapp…balaca,
Laap balaca
Bir davaydı,
Əslində
heç dava da deyildi,
bir qeylü - qaldı.
…………………………..
…………………………..
…………………………..
………………………….
İndi
əmilər,
dayılar,
istəyirsiniz aşağıda olun,
istəyirsiniz yuxarıda,
istəyirsiniz
əllərinizi
təzək sobasında qızdırın,
istəymrsiniz buxarıda,
istəyirsiniz hacı olun,
istəyirsiniz
ələm ağacı,
istəyirsiniz
Dubayda
malikanəniz olsun,
istəyirsiniz Parisdə,
İstəyirsiniz
deputat olun,
İstəyirsiniz idmançı,
İstəyirsiniz xəstə…
Az da olsa, çox da olsa
Qozunuz,
fındığınız,
kişmişiniz,
uşaqlarla
olmasın işiniz!!!!!
Qoyun
Hər bir uşağın
çiynində çantası olsun,
ağlında
nağılı olsun,
əynində paltarı olsun,
əlində qoğalı olsun…