Keçid linkləri

2016, 11 Dekabr, bazar, Bakı vaxtı 16:25

- Arazın o tayından

Kiyan Xiyav

*

Gecələr var, gecələr

Özümüzü yuxularda görək deyə

Bir dib otağa sığınıb yatırıq

Unuduruq bütün nəsəni.

Dib otağımız önündə bomboş bir küçə

Küçəmizin yiyəsi yox.

Məmləkətin yiyəsi yox

Bir xıl sümsünən aralıq itləri!...

*

Kirli sularla sulandı iydə ağaclarımız

Biz boş yerə yaxardıq yağmur daşına.

Qurduğumuz yuvalar sel basardaymış

Bunu sonralar anladıq

Və iydə ağaclarımız

Bir çiçək belə açmadı sonunda!...

*

Polislər evə girsələr Nazlıcam qorxar

Hara gedim? Kimə deyim?

Mənim Nazlıcamla sizin polislər

Bir tavan altında ola bilməzlər.

Ya siz ölməlisiniz

Ya mən evlənməməliydim!!!...

*

Biz ölkəsiz deyilik

Külək və mən

Saçınlıyıq!

*

Yaşayanda demirəm

Öləndə gül kimi ölmək istərdim.

Torpaq nədir?

İki-üç yarpağım olsa

Özüm özümü quylaya bilərəm!

*

Kim deyir azadlıq yoxdur

Mən azadam

Cümə axşamınn günortasından

Cümə gününün günortasınadək

Ölülər ruhu kimi.

*

Saatbaşı bir “özgürlük” yazıram

əllərimi gövdəsinə sürtürəm

bağrıma basır öpürəm

özgür deyiləm ancaq.

*

Azadlıq istəmirəm

Olsa

Ona şeir yaza bilmərəm!

Polis

Aaaah, araba qəzasına uğrayan bir gəncəm

Kimsiz, kimsəsiz

Kimliyi qanına çulğanmış itmiş.

incimə söyüşümdən

Ciblərimi qoru ailəm üçün

Bir buta gülün də olsun məzarıma, polis!

Qonağı ol evimin

Səni sevirəm.

Çörək ardınca qaçaqçı bir qadınam

Gözlərimdə min uydurucu maddənin

Zəhər dadan görüngüsü.

Səninsə belində tüfəng susqun qaranquş.

incimə söyüşümdən

döl yatağımda bic bir cocuğum var;

qoru onu!

Bir buta gülün də olsun məzarıma, polis!

Qonağı ol evimin

Sevirəm səni.

Günəşini arayan bir ağ quş ağarçınınam

O mil-mil qanadı çin-çin

Adı göy quşun göyərçin.

Haralara uçuram, bilirmisən?

Yox, bilməməzliyə vurma özünü

Ürəyi ağrılı buludlar belə məni tanıyır.

Sıxma qurşununu, sıxma

Quş dönər, qurşun dönməz.

Sıxdınmı artıq darıxma

incimə söyüşümdən

Qəfəslərdə qoyduğum yumurtalar var;

Qoru onu!

Bir buta gülün də olsun məzarıma, polis!

Qonağı ol evimin

Sevirəm səni.

Gözəl-gözəl geyiminlə

Gözəl-gözəl yürü qaldırımlar üzrə

Sırayla yürü

Sıra-sıra

Tanrı sırası

Tanrı sıravi polis

Tanrısı ravi polis

Kəsin tanrı anladır səni bizə

Nəsələri içdən qoruduğun üçün.

Tanrımı sırlanır səndə?

Tanrı, mısırlanır səndə

Tanrı mısır tanrısı

Polis mısır, tanrı sıradır

Polis mısır tanrısı "ra"dır.

Dilim dolaşır səni görüncə

Bir cənnnnəəəə..... bir cəhənnnnnəəəə.....deyəmmi sənlə, bilmirəm.

Ancaq

ilan dərisi tək parlaq

Paltarınız kimi ışıldaq

Ağ kağızlar işçisi bir qoşuqçuyam.

Şəhərə barıt eyiməsin deyirəm

əlləri yalın

ayaqları yorqunların önündə

qana susuz olmasın qılınc

qılınc ucuna minməsin öfkələr!

Dağ deyil, torpaq deyil, bayraq deyil

insanın adlım adına

insana qarşı olanla vuruş dur deyirəm sənə!

Gənclər, qadınlar, quşlar və qoşuqçular

incinər söyüşündən

göz yaşlarımız unutmaz adını

bir qaş ulduz qonar məzarına, polis!

Evinə qonaq et bizi

Sev bizi!....

Günün bütün mövzuları

XS
SM
MD
LG