Keçid linkləri

2016, 07 Dekabr, çərşənbə, Bakı vaxtı 12:44

- Xəyalə Sevil

Biz azad doğulmamışıq

Sən də istəyirsən,

“Mən də”

Deməyə utanıram.

Əllərin isti bir əlcək

Geyməyə utanıram.

Eh! Yalan söhbətdi azadlıq, filan,

Biz azad doğulmamışıq.

Alnımızın yazısından

Bir dəfə yıxılmamışıq.

Yıxılmaq istəyir adam,

Önümüzə qoyulan bu həyatdan

Çıxılmaq istəyir adam.

Bir azca gecikən bu məhəbbətin

Öpüm üz-gözündən,

Öpüm, yeri get.

Məni sevdiyini heç kim bilməsin,

Bilməsin, bilməsin,

Kiri, kiri get.

Bütün güclü qadınlar bədbəxtdir

Qurduğun xəyallarından

Geriyə dönmək qədər

Çətin yol yoxdu bu dünyada.

Gözlərindən yıxılan göz yaşlarını

Yanağın da qaldıra bilmir.

Baxışların buz kəsilir.

Başını qaldırıb göyə baxırsan,

Göy üzündə sənin çarəsizliyinə

Qurbanlıq qoyun kimi bir ulduz kəsilir.

Qaralır dünyan, qaralır,

Həyatın göz qapaqlarının

Arası qədər daralır...

Bütün güclü qadınlar bədbəxtdir, bilirsinizmi?

İçindəki təkliyi heç kim görmür...

Günün bütün mövzuları

XS
SM
MD
LG