Keçid linkləri

2016, 10 Dekabr, şənbə, Bakı vaxtı 07:30

- Tural İsmayılov

QADINIM


Əslində yoxsan və olmamısan

Bəlkə də heç bir zaman olmayacaqsan

Və olsan belə sən də

O da, bu da, onlar da dözməyəcəklər.

Mən də

Mənə dözə bilmirəm.

Anlaya bilmirəm

Çözə bilmirəm.

Sakitlik isytəyirəm... ana bətnindəki döl olum

Sükut istəyirəm

Dünyaya boş gözlərlə baxan küçə iti tək

Boş baxışlarla yalvarmadan sadəcə inləyərək

Ədalət istəyirəm.

Onsuz da Tanrı məni çoxdan unutdu

Asi ruhumu bəyənmədi o da

mənim kimi.

Üzümə vura bilməsən də

Utanmadan de və söylə qorxma

Keçmişimdən utanc duyduğumu özüm

Səndən də yaxşı bilirəm.

Fərq isə budur ki

Mən indimə və gələcəyimə də

İnana bilmirəm

Qadınım.

Heç vaxt olmayacaq andım

Dünyaya gəılməyəcək

qıvrımsaç oğlumun

sarışın qızımın olmayacaq anası...

Ətəyimdəki abır daşlarını tökdüm ki

bəlkə vətəndaş olum...

Ola bilmədim, ondansa uzağa köçən bir immiqrant olum.

Əllərindən tutanda sadəcə gözlərində ölüm.

Hər gün ölməkdən

bir dəfə vücudunda ölsəm də bəs edər

Qadınım.

Saflığım.

Duyğularımın illuziyasındakı ahım

Üsyankar ruhum.

Balaca bir qaraca körpənin diləndiyi dünyada

sevgini dilənərək olmayacaq körpəmin yaranmayan arzusundan yazıram.

Anlayıram.

Əslində kömür mədənlərindəki pulsuzluqla

Həyatlarını riskə atan insanlar qədər də olmadım.

Hətta boğazıma ipi də keçirə bilmədim

Yerinə bütün təfəkkürümə ilim-ilim

Didik-didik

Bircə-bircə

Damla-damla

Fəlsəfə yeritdim.

Özümün nə olduğumu çözəməzkən

Səni necə tapım ki Qadınım.

Məni məndən də çox sevəcək

Amma bilirəm ki olmayacaq yarım.

Pesimistik rituallar eybəcərdir

Optimizm isə reallığın kölgəsinə sığınan saxtakar ifritə.

Əslində məndəki ümidsizlik deyil

Ümiddir.

Olmayacaqlara inamdır

Vərəq-vərəq

qalaq-qalaq

kitablar hazır olsa da beynimdə

həsr ediləcək

layiq olacaq

toplum görmürəm

heç səni də axtarmıram

Qadınım

Qəlbimin axtarışında olub

ruhumu didikləyən parçacığım.

Heç kim sən ola bilməyəcək

Sən isə hamı ola bilərsən.

Sən bəlkə də sufistik mən olarsan.

Olmağından olmamağın yaxşıdır.

Boş ver

Nəsimidən heç danışma

Yaxşısı budur

Heç yarışma

kinli insanların

maskalı vicdanlarıyla

Vicdanım ol

İnancında yüksəlt məni

Hisslərində yaşamaq üçün

beyninə qazı məni

tut əlimdən

Birgə atlayaq dəryaya

bataq qeyb olub itək

Qadınım.

Pozacağım andım

Günün bütün mövzuları

XS
SM
MD
LG