Böyük Britaniya, İrandakı səfirliyi 2011-ci ildən bəri bağlı qaldıqdan sonra Tehrandakı missiyasının qapılarını təkrar açmaq qərarına gəlib.
2011-ci ilin noyabrında İran üzərinə qoyulmuş sanksiyalara etiraz edən izdiham səfirliyin qapı-pəncərələrini sındırmış, binanı talan etmişdi.
Britaniyanın xarici işlər naziri Philip Hammond bəyan edib ki, bu həftəsonu biznes adamlarından ibarət böyük bir nümayəndə heyəti ilə Tehrana yola düşür.
Ölkə mediası yazır ki, Tehran və London arasında daha sıx diplomatik münasibətlərin bərpası ötən ay İranla dünyanın altı gücü arasında bağlanmış nüvə sazişi nəticəsində mümkün olub.
Müxbirlər bunu da qeyd edirlər ki, Fransa İrana nümayəndə heyətini hətta sazişin bağlanmasından əvvəl göndərmiş, lakin ABŞ-ın tənqidi ilə üzləşmişdi.
2013-cü ildən bəri Londonla Tehran arasında diplomatik əlaqələr işlər müvəkkilləri səviyyəsində davam etdirilirdi.
Tehrandakı səfirliyin açılışna gəlincə isə, London artıq 2014-cü ildən oradakı missiyasını bərpa edəcəyini bildirmişdi.
Bununla, belə İran tərəfi ilə səfirliyin binası üçün yeni kommunikasiya qurğuların gətirilməsi məsələsində fikir ixtilafları mövcud idi.
Mətbuat yazır ki, tərəflər arasındakı son məsləhətləşmələrə görə Britaniya səfirliyi öz binasında yeni elektrik və kommunikasiya xətlərinin çəkilişi hələ tam başa çatmadan işə başlayacaq.
Bundan bir qədər əvvəl Britaniya İrana səfər edən vətəndaşlarına rəsmi tövsiyələrini redaktə edərək yumşaltmışdı.
