-
Hədiyyə Şəfaqət
Şeirlər
-1-
...Tanrını bilən adamların
"Niyə"-ləri,
"Nə üçün"-ləri,
Sualları yoxdur...
Yumulmuş gözlərlə susublar...
Susublar ağaclar qədər
Susublar yollar qədər...
Tanrını bilən adamların ovuclarında
Bir içimlik su kimidir sevinc...
Çiçək ətri qədər təmənnasızdır kədər...
Adamların
Özə dönüş ayinidir
Məsələn suların axması,
Məsələn günəşin parlaması...
Səbəbsizlik....
Məsələn quşların
"Bu nə zaman bitəcək" - deməsinə,
Məsələn torpağın -
"Mən niyə doğuldum?" - deyə yorulmasına...
Tanrı
Gülümsəyir...
Bitməyən varoluşun
Hər dəfəsində eyni şeylərin sorulmasına...
Yeganə cavabı Sevgidir...
Və Tanrı soruşulmuş suallara cavab vermir...
-2-
Kəpənəklər
Deyilməmiş sevgi kəlmələridir...
...Ölmüşdü və pilləkənin son basamağında dururdu
Əyildim və əlimə götürdüm
Qanadları
Qurudulmuş çiçək ləçəkləri kimi
Xatirə qoxuyurdu...
Kəpənəklər
Çiçəklərdən daha az yaşayarlar...
Hardasa
Oyanmağa gecikmiş qaratoyuq
Hələ indi
Dan yerinin nəğməsini oxuyurdu
Və onu eşitmədən bitmişdi
Kəpənəyin ömrü...
...Deyilməmiş bütün sevgi kəlmələri
Kəpənəkdir indi...
...Ayağınızı yerə ehtiyatla basın ...
-3-
Çatıb dayanmışam bəbəklərinin dərinliyinə...
Gözlərindən gəlib keçən
Yol
Yol
Yol...
Qoca,
Gəlib-gedənin çoxmu?
Mən bu üzdən o üzə keçməliyəm
Bir az da gözlərini yumma....
Ordan gəlib çıxmışam buralara
Bir zamanlar,
Hey,
Xatırladınmı?
Qapıymış göz qapaqların,
Xəbərin yoxmu,
Sehrli sözləri bilirəm,
Amma gizli saxlayacam...
Yumma hələ gözlərini
Mən o üzə keçməliyəm....
Çıxıb gedərkən qapanmamasını diləmişdim...
Açıq gözlər üçün
Sağ ol, Qoca...
Uzuuun bir səyahətdən yoruldum,
Dəriiin bir yuxum var...
Qapını arxamca
İçəridən
Bağlayacam...
-4-
...Sən
Mənə bir çöl bağışlaya bilərsən məsələn
Deyə bilərsən ki,
"Budur,
Sənə çox istədiyin bir şeylə gəldim"
Və bir dəstə çiçək uzadaraq
Və gülümsəyərək...
...Mən
Bağrıma basa bilərəm məsələn,
Qoxlaya bilərəm
Çöl qollarımın arasına sığışmaz
Daşıb gedər çiçəklərin ətriylə
Deyə bilərəm ki,
"Sağ ol,
Çox gözəldirlər"
Və uzaq yollardan bəri ləçəklərdə gizlənən yağış damcıları
İz salar köynəyimdə...
...Çöl
Bəlkə də ilk dəfə duyar necə arzulanan olduğunu məsələn
Qəlbimin atışından,
Gözlərimin içindən
Və sənə sevgimi duyar, duyar...
Çiçəkləri ehtiyatla qoyarkən masanın üstünə
Və su arxasıyca gedərkən...
-5-
Sahilsiz dənizdə
Ağ yelkənləri çiçək kimi zərif qayıq
Və nəhayətsiz göy...
Sulardamı,
Göylərdəmi olduğu anlaşılmayan
Azca qızarmış buludlar...
Günəş
Uzaq üfüqdən qalxır yavaş-yavaş...
Sular parıldayır...
Qayıq
Yan almağa sahili yoxdur deyə
Tələsmir...
Buludlar
Öz havasındadır
Göyün hər yeri eynidir...
Zaman
Günəş işığının çoxalmasından azalmasına doğru gedir...
Və o da heç kimə gərək deyil...