Suriyadan alınan xəbərlərə görə Xorasan qrupunun küveytli lideri Muhsin al-Fadhli ABŞ təyyarələrinin hava zərbəsi zamanı həlak olub.
Xorasan qrupu əl-Qaedanın Suriyadakı törəmələrindən sayılır.
Pentaqon rəsmisi bildirib ki, Al-Fadhli iyulun 8-də maşınla Suriyadakı Sarmada şəhərinə gedərkən hədəflənib.
ABŞ Hərbi Dəniz Donanmasının kapitanı Jeff Davis deyib ki, al-Fadhli 11 sentyabrdan əvvəl tanınan azsaylı əl-Qaeda liderlərindən biri idi.
Bəzi xəbərlərə görə ABŞ hərbi təyyarələri onu hələ ötən ilin sentyabrında vurmaq istəyirdi.
Əslində Xorasan qrupu barədə az-çox geniş məlumat da o vaxt mediaya çıxmışdı.
Deyilənlərə görə, bu qrupa əl-Qaedanın Pakistan və Əfqanıstandan keçmiş veteranları daxildir.
ABŞ rəsmiləri bildirirlər ki, onları Suriyaya əl-Qaeda lideri Ayman al-Zawahiri Qərb pasportları olan cihadçıların səfərbərliyə alınması və partlayış missiyaları üçün göndərib.
Bu da bildirilir ki, Xorasan qrupu əl-Qaedanın Suriya bölümü sayılan ən-Nüsra cəbhəsinin sıralarında xidmət edir.
ABŞ dövlət departamenti al-Fadhli-nin həbs olunması və ya öldürülməsi üçün informasiyaya 7 milyon dollar vəd etmişdi.