Keçid linkləri

2016, 05 Dekabr, Bazar ertəsi, Bakı vaxtı 06:46

-

Üzeyir bəy Hacıbəylinin Milli Tarix Muzeyinin Hədiyyələr və Xatirə əşyaları fondunda qorunub saxlanılan bir yadigarı bərpa olunub.

Muzeydən AzadlıqRadiosuna verilən xəbərə görə, bu, Azərbaycan SSR xalq artisti İsmayıl Hidayətzadənin materialları içərisində olan Üzeyir Hacıbəylinin «Aşıqsayağı» əsərinin notlarıdır.

İsmayıl Hidayətzadə 1937-ci il aprelin 28-də Üzeyir bəyin «Koroğlu» operasını tamaşaya qoymuş rejissordur.

Elə həminildə Bakıda nəşr edilmiş 5 vərəqdən ibarət notları bəstəkar İsmayıl Hidayətzadəyə xatirə olaraq verib.

Notlar kitabının I səhifəsinin sol küncündə Ü.Hacıbəylinin latın əlifbası ilə yazılmış avtoqrafı var: ««Koroğlu» operasının müqtədir rejissoru və sovet səhnəsinin qəlbi yaradıcılıq atəşi ilə dolu olan qızğın xadimi İ.Hidayətzadəyə bir yadigar. Ü.Hacıbəyli 8.XII-37».

Muzeyə verilərkən çox köhnə və cırıq vəziyyətdə olan notlar Muzeyin bərpa laboratoriyasının rəssamı Firuzə Ağayeva tərəfindən bərpa edilib və yenidən fondda öz yerini tutub.

Notları Muzeyə İsmayıl Hidayətzadənin həyat yoldaşı Sultan Atakişiyeva bağışlayıb.

Günün bütün mövzuları

XS
SM
MD
LG