Keçid linkləri

2016, 11 Dekabr, bazar, Bakı vaxtı 06:38

-

Sevinc Elsevər

Yeni şeirlər

oyuncaq tapançasını

bacısına tuşlayan

balaca oğlan

tətiyi çəkməmişdən qabaq

bir an saxlayır əlini

“pis adam ol

səni tapançamla vurum” deyir ona

***

evindəki bıçaqları

itilətmir qadın

tez-tez fikrə gedən biri olduğundan

gözü yol

qəlbi həsrət

çəkdiyindən

yemək hazırlayarkən

əlini tez-tez kəsir bıçaq

hər dəfə də bıçağın iti olmadığına şükür edir

barmağını sarıyanda

***

ərindən ayrıldığı

hardasa on ildi

yadırğamış kişi qoxusunu belə

indi qızının evində

mürgü döyəndə

üstünə atılan adyalı belə dəyişdirtdirir

kişi qoxusu verir deyə....

Qarşılıqsız sevgi

səni də mənim kimi sevgililərdən

ən az ağladanı

qarşılıqsız sevdiyin adam oldumu?

ən kədərsiz

təəssüflərsiz

ağrısız xatırladığın da odu....

səni gülümsədən də

yalan demədi

xəyanət etmədi

tərk etmədi heç....

tərk etmədi!

Gül bağlaması

bir vaxtlar parklarda

əlində gül bağlamasıyla gəzən qızlar

çəhrayı, sarı, mavi bələklərdə

uşaq gəzdirərlər qucaqlarında

uzaqdan çiçək bağlamasına oxşayar bələklər

bellərindəki qırmızı lentlərlə

gül qoxulu uşaqlar doğular

gül qoxulu sevgilərdən...

Sarı inək

bıçaq sümüyə dayananda

Sarı inəyin kəsilməsinə razı oldu

Sara

üzünü çevirdi

gözünü yumdu

əri inəyi kəsəndə

kəsdilər, soydular, doğradılar...

ət oldu Sarı inək

sümüklü və çəkilməli deyə

iki hissəyə ayrılan ət

ət maşınını işə saldı Sara

ət maşınınından keçirim

uşaqlara dolma büküm

nə vaxtdı yemirlər dedi...

ətin hər sabah əlləriylə

tüklərini sığalladığı

sevdiyi, əzizlədiyi Sarı olduğunu unutmuşdu ki

sarı bir tük sataşdı gözünə

ət tikələrindən birinin üstündə

Sarı bir tük buraxmışdı sanki Sara

dara düşəndə yandırıb çağırsın onu

gözlərindən yanaqlarına iki damla yaş axdı

nəvəsi onu səsləyənədək

mətbəxin pəncərəsindən

Sarı inəyin otladığı çöllərə

baxdı, baxdı, baxdı....

Günün bütün mövzuları

Şərhləri göstər

XS
SM
MD
LG