Keçid linkləri

2016, 10 Dekabr, şənbə, Bakı vaxtı 15:10

-

İki şeiri ilə "Ədəbi Azadlıq-2015" müsabiqəsinin finalına keçmiş Könül Həsənquludan yeni şeirlər

Könül Həsənqulu

QLOBUSUN GÖZ YAŞLARI

Əlimdə tutduğum qlobusu ədayla

Fırladıram barmağımın ucunda –

Bir andaca döndərirəm geriyə

Tarixin başını sürətlə

1930-cu illərə.

Gicəlləndimi

İkinci Dünya müharibəsindən geri?!

Ehmalca

Sol əlimin barmağıyla

Toxunuram Qranada bağlarına –

1936-cı ilində

Tuturam dünyanı

Ovuclarımın içində.

Tüpürürəm bütün əlisilahlı

Frankistlərin üstünə

Vahidin qan-qırmızı tüpürcəyi ilə!

Sol əlimlə əzirəm o qoyun qığını

Lorkanı güllələdikləri yerdə.

Sonra

Bir böcək əzmiş kimi,

Durub silirəm əllərimi...

Daha sonra

Vahidin dodağındakı qanı,

Alnındakı

Soyuq təri...

Və uzadıb bir əlimi Şuşaya

Yelləyirəm iki yaşlı atamın taxta beşiyini –

“Laylaa... Ata, laylaaaa.......”

Mən ovuclarımla

Əzirəm dünyanın gicgahını...

Qoy şairlərə atılası

Güllələr qalsınnnnnnnnn

Silahınnnnnnn

Boğazınnnda!

Qoy udqunsun o silah!

Qoy udsun güllələrini frankist udlağıyla!

Qoy onların da parçalansın içalatı!

Qoy öpsün onların da dodaqlarını

Vahidin qanı.

Sıxın dünyanın gicgahını!

İçin dörd nəhəng suları!

Sonda

Ağlayın o suları günəşin altında

Qupquru Qranada torpağına –

Lorkanın “məzarına”

Ağlayın

Qlobusun

Göz yaşlarıyla...

QADININ ƏSR SURƏSİ

Könül Həsənqulu

Könül Həsənqulu

And olsun axşamçağına,

İkindi vaxtına, əsr namazına, zamana və ya
Peyğəmbərin əsrinə ki,

Mən idim o sübh çağı səmada!

Gecədən doğan Günəş kimi!

Gözlərimin yaşıyla yudum Qədr gecəsini...

QAR

Canavarlar ulaşır bu gecənin içində!

Qar meşədə

Ağrısını kəsir ağır yaralının.

Qarı qucaqlayır o, açıb qollarını,

Qanısa bir tərəfdən

Əritməkdədir qarı...

Ağaclar donub kor meşədə!

Tel-budaqlarından axıb sallanır fevral –

Yarımşəffaf

Sırsıralar.

Canavarlar ulaşır bu gecənin içində...

Qan meşədə

Susuzluğunu kəsir canavarların...

Günün bütün mövzuları

XS
SM
MD
LG