-
“Ədəbi Azadlıq-2015” müsabiqəsinin qısa siyahisina keçmiş Hədiyyə Şəfaqətdən yeni şeirlər
Hədiyyə Şəfaqət
Şeirlər
..Usta,
Son rəsmini çəkməyindəydi...
Dayanmış zamanın tən ortasından uçub keçirdi,
Qanadlarının xışıltısı duyulan ağ kəpənək...
Başımı qaldırdım və buludlara baxdım...
Sonra sarı-yaşıl çöl boyu uzaqlara...
Şəffaf tül kimi dalğalandı ətrafdakı hər şey
Kəpənək qanadlarının havasında
Buludlar bir azca çölə qarışdı...
Çöl bir az daha yaxına gəldi
Və barmaqlarımın ucu toxundu tabloya...
Çobanyastığı çiçəklərinin tündlüyündəydi-
Rəng qoxusu yayıldı...
Kəpənək
Açıb-yumaraq ağ qanadlarını
Çərçivəyə doğru uçub getməyindəydi...
***
...Budur-
Bir şey daha istədim son olaraq
Heç kimsədən heç nə istəmədən həm də:
Danışmamaq...
İndi
İçmək tünd şərab kimi sehrli səssizliyi son damlasınacan,
Dayanılmış andan başlayaraq
Dairəni geri-geri getmək
Və yol boyu
İndiyəcən sərf edilmiş bütün kəlmələri unutmaq...
Zəhərlənmiş adamlar kimi...
Yaddaşı qusmaq və qurtulmaq....
Sözlər qanımıza keçmədən
Və dövr etmədən canımızda,
Və ruhumuza yetişmədən
Bunu bacarmaq...
Çəkilmək
Hələ heç nəyin olmadığı o nöqtəyə ki,
Orda
Tanrı hələ də düşünməkdədir-
"Yaratmaq, ya yaratmamaq?"...
İyun 2015