«Yeni Müsavat» qəzetindəki «İdxal olunan qazın qiyməti arta bilər» başlıqlı məqalədə bildirilir ki, Gürcüstanın Rusiyadan aldığı qazın qiyməti gələn ildən iki dəfədən də çox bahalaşaraq hər kubmetr üçün 230 dollara qalxa bilər. Bu barədə Rusiyanın «Qazprom» şirkəti qərar verib. Müəllif yazır ki, hələlik qarşı tərəfin məsələyə reaksiyası məlum deyil. Göstərilən məbləğin MDB ölkələri üçün təklif edilən qiymətlər arasında ən yüksək rəqəm olması göstərir ki, burada iqtisadi yox, siyasi maraqlar var. Hazırda Gürcüstan əlavə qaz mənbələri axtarır. İlkin variant kimi İran və Azərbaycandan qaz alınması üzərində düşünülür. Müəllif onu da qeyd edir ki, Azərbaycanın da Rusiyadan idxal etdiyi qazın qiymətinin gələn ildən artacağı gözlənilir.
«Şərq» qəzetindəki «Millət vəkillərinin hesabat dövrü» başlıqlı məqalədə bildirilir ki, hazırkı Milli Məclisin fəaliyyətinin bir ili tamam oldu. Müəllif yazır ki, iclasların az-az keçirilməsinə baxmayaraq, hər bir millət vəkili üçün arxada qalan bir il hesabat xarakteri daşıyır. Söhbət əlbəttə ki, millət vəkillərinin öz seçicilərinə hesabat verməsindən gedir. Müəllif qeyd edir ki, seçki kampaniyası dövründə deputat olmaq istəyən şəxslər seçicilərinin rəğbətini qazanmaq, onları yaxşı deputat olacağına inandırmaq üçün əgər ərazidə su yoxdursa, yol salınmayıbsa, belə məsələləri operativ şəkildə həll edirdilər. Maraqlıdır ki, parlament seçkiləri başa çatdıqdan sonra belə qayğıların həlli ilə məşğul olmağı davam etdirmək yaddan çıxdı. Bir neçə millət vəkili istisna olmaqla, öz seçicilərinə yardım əlini uzadan olmadı. Halbuki deputatların böyük əksəriyyətinin imkanı çatar ki, seçildiyi rayonun, seçicilərinin problemlərinə yardımçı ola bilsin. Lakin görünən budur ki, millət vəkillərinin böyük çoxluğu hesabata hazır deyillər. Onların öz seçiciləri ilə hesabat görüşü keçirməməsi ondan xəbər verir ki, seçkiqabağı verdikləri vədlər yönündə həddən-ziyadə az çalışıblar.
«Bakı-Xəbər» qəzetindəki «Səfirliklər çoxaldıqca, diplomatiyamız zəifləyir» başlıqlı məqalədə müəllif yazır ki, böyük neft gəlirləri daxil olmağa başlayandan sonra onun ölkə daxilində xərclənməsi üçün ən müxtəlif layihələrin həyata keçirilməsi təmayülü aydın sezilir. Körpülər, yollar, tunellər müxtəlif dövlət orqanları üçün ofis binalarının tikintisi geniş vüsət alsa da, bunun ölkənin sosial-iqtisadi inkişafına, azacıq da olsa, müsbət təsir edəcəyinə kimsə inanmır. Çünki aşkar görünür ki, böyük neft gəlirlərini müxtəlif iqtisadi, maddi istehsal sahələrinə, xırda və orta biznesin inkişafına yönəltmək siyasəti əvəzinə, onu daha çox mənimsəmə imkanları açan tikintilərə, dövlət məmur aparatının genişləndirilməsinə, qulluqçuların maaşlarının artırılmasına yönəldirlər. Müəllif yazır ki, yaxın aylarda Asiya, Afrika, Latın Amerikasının qeyri-demokratik ölkələrində səfirliklərin açılması da gözlənilir. Hökumət bu yolla həm diplomatik korpusun sıralarını genişləndirir, həm də neft gəlirlərinin yaratdığı artıq pul kütləsinin bir hissəsini ölkədən çıxarmaqla ondan can qurtarmağa çalışır.
«Yeni Azərbaycan» qəzeti xəbər verir ki, Türkiyənin Özəlləşdirmə İdarəsi Başkanlığı ilə Azərbaycanın Dövlət Əmlakının İdarə Edilməsi üzrə Dövlət Komitəsi arasında əməkdaşlığın inkişaf etdirilməsi sahəsində niyyət protokolu imzalanıb. Komitənin sədri Kərəm Həsənovun Türkiyəyə səfəri zamanı imzalanmış sənəd ölkələr arasında özəlləşdirmə siyasətinin həyata keçirilməsində birgə əlaqələrin yaradılmasını, bu sahədəki təcrübənin öyrənilməsini və artırılmasını, informasiya mübadiləsinin genişləndirilməsini nəzərdə tutur.