Bu yazılarda prezident İlham Əliyevin şəxsi keyfiyyətləri haqda müsbət notlar yer alsa da, ölkədə korrupsiya, şəxsiyyətə pərəstiş, regionların ağır sosial vəziyyəti də təsvir olunur.
«Bu, şəxsiyyətə pərəstişdirmi» sualına isə «Heydər Əliyev» Fondunun möhtəşəm binasında müxbirin rastlaşdığı kurator belə cavab verir: «Siz nə danışırsınız? O, Azərbaycanı demokratiya yoluna çıxarıb».
Müxalifət İlham Əliyevin hakimiyyəti saxlamasına mane ola bilməsə də, onu zəif sayır. AXCP lideri Əli Kərimli onu Heydər Əliyevlə belə müqayisə edir: «Onun o cür liderlik qabiliyyəti yoxdur, o cür xarizması yoxdur».
Müxalifət liderlərinə görə, İlham Əliyev zəifdir və atasının kölgəsində, mühafizəkar rejimin köməyi ilə çalışır. Korrupsiya içində olan iqtisadiyyat isə neft gəlirlərinin hesabına ayaqda durur.
İlham Əliyev isə Prezident Aparatında xarici jurnalistləri qəbul edərkən deyib: «Bu gün bizim Azərbaycanda gördüyümüz odur ki, özlərini hökumətimizə müxalifət adlandıranlar tam iflas olublar. Bu, tam iflas və onların tarixinin sonu deməkdir».
Müxbir Prezident Aparatına girəndə gözünə dəyən bir detalı da qeyd edir: «Mərmər haşiyəli giriş zalında Heydər Əliyevin büstü ucaldılıb. Düz vaxtilə Leninin büstü olan yerdə».
«Christian Science Monitor»un müxbiri Fred Ueyr İlham Əliyevin bir şəxs olaraq onda müsbət təəssüratlar oyatdığını vurğulayır. Onu yaddaqalan, xarizmatik bir fərd kimi dəyərləndirən Ueyr, prezidentin heç bir sualı cavabsız qoymamasını, doğma dilləri olmayan ingiliscə və rusca arasında sərbəst gəzişdiyini, belə qabiliyyətin tək-tük liderə nəsib olduğunu vurğulayır. Neft gəlirləri hesabına ölkənin yaxşıca varlandığını qeyd edir. Prezident bu gəlirlər hesabına sosial və iqtisadi problemlərin həll olunacağını deyir. Amma ölkədəki vəziyyətə və hökumətin siyasətinə gəlincə, müəllif burda durumun ağır olduğunu yazır: «Azərbaycan dünyanın ən çox korrupsiyalaşmış ölkələrindəndir. Tənqidçilər narahatdırlar ki, hökumət bu qədər gəliri idarə etməyə pis hazırlaşıb».
Qəzet də 2003-cü il prezident seçkisinə toxunur. Amma obrazlı ifadə ilə: «Atası...Heydər Əliyevin ölümündən sonra Əliyev tək-tük beynəlxalq müşahidəçinin azad və ədalətli saya bildiyi seçkidə paraşütlə prezidentliyə atıldı. Ekspertlərin çoxu keçmiş SSRİ-nin ilk sülaləsinin sürəkli olacağına şübhə edirdi». Amma müəllifə görə, İlham Əliyev atasının didişən komandasının ağzını yığa bildi və həm Rusiya ilə, həm də Qərblə dostlaşdı: «Prezidentin kabinetindən görsənən paytaxtda gurhagur tikinti gedir, şəhər qaynayır. Amma paytaxtdan qıraqda qaz və sudan korluq çəkən, kanalizasiyanın nə olduğunu bilməyən nə qədər desən koma var. İnsan haqları fəalları bu sahədə də bərbad vəziyyət görürlər. Nyu-Yorkdakı «Human Rights Watch» Azərbaycan hökumətinin müxalifəti və vətəndaş cəmiyyəti qurumlarını əzməkdə, tənqidi boğmaqda böyük səriştəsi olduğunu bildirir».
