Türkiyə baş naziri Ahmet Davutoğlu-nun milliyyətcə erməni müşaviri Osmanlı İmperiyasında erməni qətllərinin 100-cü ildönümü ərəfəsində vəzifəsini tərk edib.
Türkiyənin erməni icmasından ölkə hökumətində ilk baş müşavir vəzifəsini tutan Etyen Mahcupyan Reuters agentliyinə bilirib ki, o hələ mart ayında 65 yaşı tamam olarkən təqaüdə çıxıb, lakin qeyri-rəsmi olaraq cənab Davutoğlu-na müşavirliyini davam etdirirmiş.
Əgər Bosniya soyqırımdırsa…
Mahcupyan deyib ki, onun bu yaxınlarda Osmanlı zəmanəsində ermənilərin qətlləri ilə bağlı verdiyi şərhin tutduğu vəzifəyə heç bir dəxli olmayıb.
O deyib kİ, Türkiyədə 65 yaşında pensiyaya çıxmaq hər bir vətəndaş üçün icbaridir.
Cənab Davutoğlu-nun ofisində baş müşavirin xidmətinin başa çatdığı təsdiq olunub.
Mahcupyan bu həftənin əvvəllərində verdiyi bəyanatla hakim Ədalət və İnkişaf Partiyasının sıralarına çaxnaşma salmışdı.
O demişdi: “Əgər Bosniya və Afrikada baş verənləri soyqırım sayırıqsa, onda 1915-ci ildə ermənilərin başına gələni soyqırım saymamaq mümkün deyil”.
Nə müşavir mövqeyidir, nə də vətəndaş
Türkiyənin Avropa məsələləri naziri Volkan Bozkır demişdi ki, Mahcupyan-ın bir əsr əvvəl Osmanlı imperiyasında baş verənlərə baxışı onun baş nazirin müşaviri kimi vəzifəsi ilə bir araya sığmır.
Bozkır demişdi ki, o bu bəyanatı Mahcupyan-ın şəxsi mövqeyi hesab edir, lakin bu halda da bu, Türkiyə vətəndaşının mövqeyi sayıla bilməz.
O həmçinin ümid etdiyini bildirmişdi ki, Mahcupyan “öz qiymətləndirməsinə yenidən baxacaq”.
Ötən oktyabr ayında tanınmış yazıçı Etyen Mahcupyan-ın baş nazirin baş müşaviri təyin edilməsi hökumətin milli azlıqlara ehtiramı kimi alqışlanmışdı.
