Keçid linkləri

logo-print
2016, 04 Dekabr, bazar, Bakı vaxtı 18:45

Könül Həsənqulu yeni kitabını təqdim etdi [Fotolar]


Könül Həsənqulu (sağda) yeni kitabını imzaladı

Könül Həsənqulu (sağda) yeni kitabını imzaladı

-

Azərbaycan Yazıçılar Birliyinin Natəvan klubunda Könül Həsənqulunun “O zəminin sahili...” kitabının imza günü keçirilib.

Kitab Azərbaycan Yazıçılar Birliyinin aybKitab layihəsinin nəşridir.

Mərasimdə iştirak edənlər – Vaqif Yusifli, Kəmalə Abiyeva, Həyat Şəmi, Qan Tural, Fərid Hüseyn, Qulu Ağsəs, Səlim Babullaoğlu, Cavanşir Yusifli və başqa yazarlar müəllifi növbəti kitabının işıq üzü görməsi münasibətilə təbrik ediblər, ona yaradıcılıq uğurları arzulayıblar.

Könül Həsənqulu kitabını qələm dostları, oxucuları üçün imzalayıb.

ayb.az

Tədbirdən fotolar: OxuZalı

Könül Həsənqulu

Könül Həsənqulu

Könül Həsənqulu


ZƏMİ NƏĞMƏLƏRİ


21:50

Sıx zəmi –
Uzun otlar, buğdalar...
Köksündə
Kərpicdən ev –
İçində bir cüt ağac.
Pəncərədən
İşığa qarışıb, çölə –
Zəmiyə sızan
Budaqlar...

Sıx zəmi...
Avqust... Yaşıl otlar...
21:50.
Göy üzündə
Yol alıbdır yolçular –
Qırmızı, göy və
Qap-qara buludlar.

Sıx zəmi –
Sünbüllərin bağrın yaran
Arpalar...
Müqəvvasız otluqlarda
Yuva qurub
Mürgüləyirlər
Quşlar.

Sıx zəmi –
Bir azca mən,
Bir azca sən...
Bir ovuc göy,
Bir ovuc yer

Zəmi dolu
Buğdalar...


SÜNBÜLLƏRİN PIÇILTISI

Uzaqlarda külək əsincə
Qədim nəğmələr çalınar –
Zəmidə sünbüllər başlarını
Bir-birinin çiyninə qoyub
Pıçıldaşarlar...

Külək gücləndikcə
Onların da sürəti artar.
Beləcə bütün zəmi boyunca
Bir xəbər yayılar...
Bir nəğmə çalınar...


BİÇİNÇİ NƏĞMƏSİ

1
İyun...
Yasəmənlər
Jasminlər çiçəkləyir

Qollarında tumurcuqlar
Arel
May
Uzaqdan əl yelləyir
Gülümsəyir
Gözdən itir

2
Qırmızı buludlar üzür səmada
Bir əlimdə dəmir nimçə
İçində çiy buğda
Dayanmışam
Göydələnin damında

Külək
Saçlarımı qaldırıb havaya
Oynadır əhvalıyla –
Sağa sola...

Sonra yanaqlarıma
Gözlərimə
Sığal çəkir saçlarımla

3
Baxıram əlvan buludlara
Dəstə-dəstə göyərçinlər uçub gəlir
Toplanırlar ətrafıma

(Əllərimə zillənibdir indi
Mavi göyərçinlərin qırmızı gözləri
Bu baxışlar hər səhər oxşayır
Öpür əllərimi…)

Əlimdə bir ovuc buğda
Və alıb
Göyərçinlərin baxışını da ovcuna
Əlim uçur havada…

4
Buğdaların vətəni – müqəddəs zəmi
Ağlayır uzaqlarda…

Biçinçilər orda
Sünbülləri biçirlər indi
Və folk nəğmələr oxuyurlar
Bu küləkli havada

Günəşsə zəmini qucaqlayır
Günəş
Şüalarına qarışıb
Zolaq-zolaq
Zəmiyə axır…
Hörüklü saçlarını –
Sünbülləri sığallayır…

5
Biçinçilər oxuyurlar orda
Biçinçilər…

Küləklərə
Buğda-arpa sevdasını üfürürlər

Həmin küləklərdi burulur damda…
Bu göyərçinlər də
O biçinçilərin nəğmə sədası altında
Səpdiyim buğdalara doğru
Uçuşaraq rəqs edirlər...

6
Biçinçilər…
Göyərçinlər…

Orda biçinçilər
Zəmiyə oraq vurduqca
Burda quşlar nəğmə deyir…
Göyərçinlər
Sərçələr sevinir
Pərvaz edirlər səmada…

Günün bütün mövzuları

Şərhləri göstər

XS
SM
MD
LG