-
Elşad Barat
Qar dənələri
Bu qar dənələri tanışdı mənə
Elə bil evimin içinə yağıb
Hardasa bir şəhid məzarı üstə
Hardasa bir qızın saçına yağıb
Bu qar dənələri tanışdı mənə
Sözün dodaqlardan küsdüyü qədər
Dilənən uşaqın dayanacaqda
Açılmış əlinin əsdiyi qədər
Bu qar dənələri tanışdı mənə
Göylərin günahın gətirib, anam
Gör neçə sevgiyə şahidlik edib
Gör neçə sevgini bitirib, anam
Bu qar dənələri tanışdı mənə
Deyəsən ruhumun sirdaşı olub
Bəlkə də, kiminsə günah payıdır
Bəlkə də, kiminsə göz yaşı olub
Bu qar dənələri tanışdı mənə
Buludlar göndərib, zəfər gətirib
Birin də qoymaram yerə düşməyə
Deyəsən allahdan xəbər gətirib.
Dilənəsən
Allah qanad verə uçub gedəsən
Gedib bu şəhərdən uzaq olasan
Başqa bir şəhərdə başqa allaha
Yalvarıb təzədən uşaq olasan
Yetim uşaqları yığıb başına
Əl açıb göylərə qar dilənəsən
Təndirə söykənib baxan nənədən
Çörəyə yaxılmış şor dilənəsən
Gecə yaxınlaşa, hava sərtləşə
Kimsəsiz küçədən tutub qalasan
Uşağı olmayan varlı qadının
Girib yuxusunda yatıb qalasan