-
BMT İraqda "İslam dövləti" yaraqlılarının qədim Assuriya şəhəri olan Nimrudun xarabalıqlarını buldozerlə dağıtmasını pisləyib.
Və 3 min ildən artıq yaşı olan mədəniyyət abidəsinin məhvini "hərbi cinayət" adlandırıb.
BMT-nin baş katibi Ban Ki-moon regionun siyasi və dini liderlənini Nimrudun dağıdılmasını pisləməyə çağırıb.
Nimrudun qalıqları yaraqlıların nəzarətində olan Mosuldan 30 kilometr aralıda yerləşir.
Hazırda İraq ordusu "İslam dövləti"nə qarşı genişmiqyaslı hücum həyata keçirir.
Abidələrin dağıdılması haqda xəbəri İraqın turizm nazirliyi yayıb. Əraziyə bəzi abidələrin daşınıb aparılması üçün yük maşınlarının da gətirildiyini deyib.
Bundan əvvəl "İslam dövləti" Assuriya abidələrini Mosul muzeyində necə məhv etdiyi ilə bağlı video da yaymışdı.
Arxeoloqlar, dünya sivilizasiyasına vurulan ziyan baxımından, Nimrudun məhvini 2001-ci ildə Talibanın Budda abidəsini dağıtması ilə müqayisə edirlər.
"İslam dövləti" hesab edir ki, pirlər, məqbərələr, qədim abidələri ziyarətgaha çevirmək olmaz, bu, allaha şərik qoşmaqdır və onlar məhv edilməlidir.
