-
BMT-nin insan haqları ekspertləri və beynəlxalq hüquq müdafiə təşkilatları İrana çağırış edirlər ki, azyaşlı ikən cinayət törətmiş gənc iranlı kürdü edam etməsin.
22 yaşlı Saman Naseem-in edamı fevralın 19-a planlaşdırılır. O, Kürdüstanın Azad Həyatı Partiyasının üzvü olmaqda və İnqilab Qvardiyası ilə silahlı toqquşmalarda iştirakda təqsirli bilinib.
17 yaşında həbs olunub və 2013-cü ilin aprelində ölümə məhkum edilib. Ona işgəncə verildiyi bildirilir.
İranda insan haqları üzrə xüsusi məruzəçi Ahmed Shaheed və BMT-nin qeyri-qanuni edamlar üzrə xüsusi məruzəçisi Christof Heyns fevralın 18-də yaydıqları bəyanatda bildiriblər ki, "gənclərin edamını insan haqları üzrə beynəlxalq qanunvericilik qadağan edir".
Amnesty International və Beynəlxalq İnsan Haqları Federasiyası da edamı dayandırmağa çağırıb. AI fevralın 17-də bildirib ki, Naseem-in planlaşdırılan edamı "ölkədə ədalətsizliyin durumunu göstərir".