Keçid linkləri

2016, 06 Dekabr, çərşənbə axşamı, Bakı vaxtı 20:05

Bu dəfə dəqiq öləcəyəm... Vur! Qorxma


Könül Həsənqulu

Könül Həsənqulu

-

Könül Həsənqulu

YENİ ŞEİRLƏR

“QUM KİMİ” YORĞUN

O kürdün mahnılarından sonra

Bircə çırtmayla öldürmək asandır məni

Yaxın gəl...

Qapıları bərk-bərk kilidlədim, çəkdim pərdələri!

“Dava-dava” oynamaqdansa

Mən təslim oluram

Qaytar indi

Cibindəki buğdaları geri – ovuclarıma

Cücərəmmədi səndə o buğdaların heç biri

Qaytar!

Sonra bir çırtma vur udlağıma...

Bu dəfə dəqiq öləcəyəm... Vur! Qorxma.

QARANLIQ

Gecənin

Silahları susdurub köndələn yıxan saatlarıdı

Bax...

Ovuclarıma sıxmışam

Başımın üstündə qaynaşan qara qarğaların

Kin vurnuxan qanadlarını

Və susdurmuşam

Susdurmuşam içimdə

Züleyxanın qara zindan misalı Yusifə zülm edən məkrini

Ağrılarını

Gecənin

Kor qaranlığıdı

Gəl...

Ayı

Dağların ətəyinə

Günəşi

Bir körpənin əllərinə tapşırmışam

Tutsunlar

Saxlasınlar sabahacan

KİÇİK FORMATDA KÜÇƏ

Küçədə əl izləri var

Çəkilib üzüaşağı

Həzin bir sığal

Damlarda göz yaşları

Ordasa yaydı

Ovcunda tutub bir kişi üst-üstə iki çörək

Sol qolunda saatı

Əlində

Qara eynək

Çörəyin üstündəsə

Qat-qat öpüş izləri – anamın dodaqları

Bu –

Sənin fotoşəklindir

Ata!

SƏNDƏN SONRA

Axtarırdım sənə qovuşmağın yollarını –

Öncə düşüb həyətə

Ovuclarımla su səpdim əkdiyin güllərin dibinə

Bəlkə orda susuzsan deyə...

Sonra geri çəkdim divar saatımızı

Anamın qoparıb atdığı təqvim ləçəklərini də

Gətirib yapışdırdım yerinə

Bəlkə bu arıq əllərimlə

Geriyə çəkə bilərəm deyə zamanın çarxını

Olmadı...

Səndən sonra o şəkillərin də

Heç birindən mənə ata olmadı

Heç biri çərçivələri sındırıb çıxmadı...

Günün bütün mövzuları

XS
SM
MD
LG