ABŞ Dövlət katibi John Kerry yanvarın 16-da Parisdə Fransa rəsmiləri ilə görüşüb.
Görüşdə məqsəd yanvarın 7-də Parisdə törədilən terror aktlarından sonra Fransaya həmrəylik nümayiş etdirməkdir.
Kerry prezident Francois Hollande ilə görüşdə ölkəsinin Fransanın dərdinə şərik olduğunu bildirib.
Francois Hollande bildirib ki, ABŞ-la Fransa ifratçılığa qarşı birgə mübarizə aparmalıdırlar.
Kerry bundan əvvəl fransalı həmkarı Loran Fabiusla (Laurent Fabius) görüşdə deyib ki, əvvəlcədən planlaşdırılmış səfərdə olduğundan yanvarın 11-də Parisdə keçirilən yürüşdə iştirak edə bilməyib.
Kerry hücumlara məruz qalmış Şarli Ebdu jurnalının redaksiyası, koşer mağazası və polis əməkdaşının öldürüldüyü yerə əklillər qoyacaq.
Yanvarın 7-9-da törədilən bu hücumlarda 17 nəfər ölüb.
İslamçı yaraqlılar bununla Məhəmməd Peyğəmbərin karikaturlarını çap edən satirik Şarli Ebdu jurnalından qisas aldıqlarını deyirlər.