“Kimsə müraciətində götürüb ümumi şəkildə nəsə yazırsa, belə müraciətlərə məhəl qoymağa ehtiyac yoxdur, şikayətlər konkret faktlara əsaslanmalıdır”. APA-nın məlumatına görə, bunu yanvarın 11-də Mərkəzi Seçki Komissiyasının (MSK) sədri Məzahir Pənahov söyləyib. MSK-nın iclasında çıxış edən M.Pənahov müəyyən yerlərdə bələdiyyə seçkilərinə kölgə salmaq hallarını hiss etdiyini deyib.
Xəbərdə bu cəhdlərin hansı formada baş verdiyi bildirilmir, lakin qeyd edilir ki, MSK sədri Seçki komissiyalarının üzvlərinin, müşahidəçilərin, seçicilərin səsvermə prosesində məsuliyyətli olmasını zəruri sayıb.
MSK 2014-cü il dekabrın 23-də keçirilmiş bələdiyyə seçkiləri ilə əlaqədar daxil olmuş müraciətlərə baxıb, İmişli, Astara, Zaqatala, Şəmkir Şamaxı, Qazax və digər rayonların ərazisində yerləşən müxtəlif seçki məntəqələrində pozuntular haqda şikayətləri əsassız sayıb.
Yanvarın 11-də bələdiyyə seçkilərinin yekunlarının yoxlanılması və təsdiqi üçün MSK-ya ayrılmış vaxt başa çatır.
