-
Bazar gününə keçən gecə Almaniyada "Hamburger Morgenpost" qəzetinin redaksiyasına daş və yandırıcı maddə atılıb.
Bu qəzet Parisdə radikal islamçıların hücumuna məruz qalmış və əməkdaşlarının çoxu öldürülmüş "Charlie Hebdo" satirik jurnalından Məhəmməd peyğəmbərin karikaturalarını götürüb çap etmişdi.
Britaniyanın "Guardian" qəzeti xəbər verir ki, hücum nəticəsində redaksiyanın birinci mərtəbəsində yanğın baş versə də, qısa müddətdə söndürülüb.
Zərər çəkən olmayıb. Özünü şübhəli aparan iki nəfər saxlansa da, hələ ki onların insidentlə bağlılığı təsdiqlənməyib.
"Hamburger Morgenpost" 90 min tirajla çap edilir.
"Charlie Hebdo"ya hücumdan sonra Qərbin, o cümlədən Almaniyanın bir sıra mətbu orqanları fransız həmkarları ilə həmrəylik nümayişi və ekstremistlərin söz azadlığına basqısı önündə geri çəkilməmək jesti kimi karikaturalara öz səhifələrində yer ayırmışdılar.
"Hamburger Morgenpost" Parisdəki terror aktının səhərisi "Daha çox azadlığa imkan verilməlidir" sərlövhəsi ilə Məhəmməd peyğəmbərin 3 karikaturasını çap etmişdi.
Almaniyanın "Bild am Sonntag" isə qəzeti yazır ki, Parisdəki hadisə Avropada yeni terror dalğasının başlanğıcı ola bilər.
Qəzetin yazdığına görə, ABŞ kəşfiyyatının radikal islamçıların telefonlarını dinləməsi zamanıəldə edilən məlumatlar bunu ehtimal etməyə əsas verir.