Keçid linkləri

2016, 06 Dekabr, çərşənbə axşamı, Bakı vaxtı 22:22

-

DILQƏM

ŞEİRLƏR

səhər tezdənin yarıçılpaq yalnızlığı ilə şeir yazmaq

yorur adamı,

deyirsiz şair adamdı da, deyil.

təqvimə baxıram,

bu gün qutuda qalan son siqaretimin ad günüdür,

onu qeyd edəcəm

ah! necə də xoşbəxtəm.

gündə beş dəfə azan səsindən əlvidalar düzəldirəm özümə,

özüm özümdən gedirəm, məndə ayrılıq nə gəzər?

olsa olsa sabahın xeyir, necəsən?

ya da hara gedirsən? məni də gözlə

sanki hara gedəcəm ki.

ruh halım dinc durmur, yenə tutması tutub

həftə sonları həyat bizi unudub, sonra yenə davam edir

daha hara gedim ki?

yarı yolda qalan arzularım da məni buraxıb, geri qayıtdılar,

bezib halımdan.

nə deyirsiz, ey buludlar? yenə nə yığışmısız ora?

səsiniz guruldayır,

yağacaqsız, yağın qurtarın

bizim qanımız qaradır onsuz

ey, buludlar!

bizim qan qruplarımız yoxdur,

damarlarımızda qan buruqları yaranıb

qaranlıq istehsal edirik xarici ölkələrə.

ah! necə də bədbəxtik.

bu gün son siqaretimin ad günüdür,

yorğunam,

bir yandan da şeir yazıram.

***

içimdə səssizlikdən burulğanlar,

çölümdə yalnızlıqdan hörülmüş divarlar var

sözdə tək qalmaqdan qorxuram guya.

guya yatmaq istəmirəm səhərləri,

durub zəhərlənib, çıxmaq istəyirəm evdən.

hava soyuqdan tez qaralır məncə

soyuqdan yata bilmir insan gecələri,

yalnızlıq zad bəhanədir.

içində sənsizlikdən xışıltılar olan mahnılar var,

qulaq asdıqca unudurdum səni guya.

sonra səhərləri təkrar yada salıb,

gecələri daha dərin, daha ölümcül unudurdum səni..

sonra hava yenə tez qaralır,

yenə gecikirdi insanların yuxuları

və soyuqda yazılırdı bütün ayrılıq məktubları.

***

sən həyatımda gördüyüm ən uzaq adamsan,

çox uzaqdasan,

əllərimi uzatsam tutarsanmı?

əmin deyiləm..

unutsan da gözüyumulu unudarsan,

ya da sonra unudarsan,

hazır deyiləm hələ..

mən həyatında gördüyün ən yaxın insanam sənə

inansan da, inanmasan da

yenə hansı şeirdə qalmısan,

yadımda deyilsən..

yəqin o yarımçıq şeirdəsən,

sonu sənlə bitən gərəksiz bir cümlə..

ki, gərək biz unudaq olanları

elə bu cümə axşamı,

saat on birə qalıb, hava da bərk şaxtalı

unudaq olanları yanaqların qızarmamış,

unudaq bu cümə axşamı, saat çox gec olmamış

sən həyatımda heç olmamış kimisən sanki..

Günün bütün mövzuları

XS
SM
MD
LG