-
Arazın o tayından
Türkan Urmulu
YENİ ŞEİRLƏR
Ürəyimin çağrılmamış qonağı
Xoş gəlibsən
Buyur əyləş bu evin ən yuxarı başında!
Gözlərində sərhəd
Gülüşündə özgürlük izləri var
Belə gərib bir haldasan
Bir az vətən, biraz gurbət qoxursan
Elə bil ki 101 ildir tanışsan!
Yorğunmusan?
De! Necə əzizləyim səni?
töküm bir sevgi çayı iç
Sonra da köksümə qoy başını
Ürəyimin çağrılmamış qonağı
Amandı tez getmə qal
Istərsən al
Evimin-eşiyimin
səndə qalsın var yoxumun açarı...
***
Parça-parça deyil
Büsbütün mənim olmalısan
Günəş kimi aydın
Şərab kimi çılxa
Gözlərim kimi olmalısan sevgilim
Gözlərimə baxdığın kimi dəli, dəlim!
Qatqısız ...
Çılpaq ...
Sevgimin bitdiyi yerdir
Səni bir an belə paylaşmaq...
***
Zır dəli mən
səni bir az ağıllıca sevmliyəm!
Qış gəlmədən üşüməyə başlamışam
yadlaşmış baxışların
bir az da qansızlamışam
hər ay gəlib keçən qırmızı günlərimdə günah
qadınlığımın üzü ağ olsun...
itələmə sənə sarılan ürəyimi
heç yün yorğanıma da elə sarılmadım qarlı gecələrdə
onun sənə sarıldığı kimi
sənə doğru baxmadığıma baxma
böyüklük et
amandır çox uzaqlaşma...
***
Səni necə tanımaq olar, bəy?
hansı kitabda
hansı əlifbayla
Hansı dildə yazılmışsan?
Tarixin açılmamış o gizli səhifələrinə bənzəyirsən
Bir millətin gerçəyini köksündə daşıyan kətibə kimisən
Od, su, torpaq dadındadır dodaqların
Bilmirəm heç oxuyan oldumu gözlərini indiyə qədər?
çoxdan varaqlanmamış əski bir şeir
bəlkə də hələ yazılmamış
yaşam fəlsəfəsi kitabına bənzəyirsən
səni necə tanımaq olar, bəy?
Orxun abidələrinə baş vurmağım gəlir
Ya da məni özlüyümə götürən
hər hansı kəşf olunmamış
bir şeylərə
bir yerlərə
səni necə tanımaq olar, bəy?
getməliyəm
bu zamanın ötəsində bir gerçəyə
bəlkə gələcəyə
bəlkə də çox çooox əskilərə ...
***
Almanı...
Almanı...
Almanı atdın haraya
küçəndə oldum avara
düşdüm bəladan-bəlaya
A tirmə sevgim,
sarı dərdim,
bəyim, haralısan?!
Gəlin gedək bizim bağa
hərə dalaq bir xəyala
vurulmuşam igid yara
A doğma ruhlum, al baxışlım
bəyim, haralısan?!
a könlü göyçək,
sözü gerçək,
sən el dayağısan...
***
Burax,
payızın ilk günündə
Bir xəzan da mən yaşayım
Səndən öncəki hər kəsi
Bütün xəzəlləri atım...
Burax,
Sənə bir şeir sunum
Səndən öncə yazılmlş bütün sevgi şeirlərini
Yarpaq yarpaq qoparıb
Pəncərəndən savurum...
Payızın ilk günündə burax
Mən də bir ağac olum
Çırıl-çılpaq soyunub
Çırıl-çıplaq sevginlə
Yep-yeni bir bahara
gözlərinlə qovuşum...
Burax məni,
Burax,
səndə arınım ...
***
Çox da rəngsiz keçməyir
Sənsiz uzaq gecələr
Nar dənəlirəm
Ürəyinin sağlığına...
O, ana südündən də halal gözlərin
Təkrarlanır gözlərimin önündə
Qıp-qırmızısan!
Istədiyin qədər yasaq ol
Sən xəyalımın şah əsəri
Könlümün tək durağısan...
***
Nə günah
nə savab etmək
nə sevişmək
nə təvaf etmək
gecələrimi, gündüzlərimi süsləyən
ey qapqara bəmbəyaz bəy
payızın yazın
özgür əsir yarpaqlarındaki rəngə çalır
uzaqlığın yaxınlığın
kədərim sevincim
gəl gəlmə...
sənə qarşı səndən yana olan bu duyğu bu ağıl
gəlişinlə gedişinlə
səninlə
sənsiz belə
əzilməz büzülməz ...
***
Qanad-qanad yüksələrək
Ulduzları tumarlayıb
Aydan ışıq borc alacaq
çox da gözəl olacaq!
Sevgimiz
Ət köynəyini sarıyıb
Ruhla birgə
barış
ilqar
inam deyib
Ürək kimi çarpacaq...
Kədərlənmə, sevgilim
Çox da gözəl sevgimiz
Həvəs deyil, ancaq nəfəs olacaq...
***
Nə ana dili qaldı artıq
nə də ana...
kimlik
vətən
millət
torpaq
kimin umurunda!?
qutu qurumuş bir qələm qaldı əlimizdə
ondan da ancaq
həsrət şeirləri axacaq...
burası zülmət
burası qürbət
nə olarsam olum
sonsuza dək ürəyim iltica qoxacaq ...
***
Bulantı
Ancaq sevgi deyən
Dəp dəli bir ürəklə
Siyasət masasının arxasında oturmaqdır,
Bardaq bardaq
Güc
Qayda qusan
politik bəylərin huzurunda...
mas mavi özgürlük aforizmlərini düşünərək
məni qurtaran
əlində dırmıqla buğda biçən
gözəl bir qız şəklidir
bu yarış alanının duvarında...
***
Şərabın
bardaqlarda donduğu o gecə
bu sevginin gerçəkliyinə inandım
ağlayaraq
donmayan göz yaşlarını
əllərimlə silərkən ...
***
Çox tez axşam olur
Çox da gec səhər
Sənsizlikdənmidir soyuq qaranlıqların belə uzun keçməsi!?
***
Şallaq,
Batum,
Qandal,
Dustaq...
Yasaq dili yaşatmaq
Aclıq edən tox aydınlar...
İşıq üçün qaranlıqlarda tutsaq
Yəni əsir bir torpaq
O torpaq...
Aldanmayın gülüşümə
Ondan uzaq,
Yediyim içdiyim danlaq...
Yasaq
Yasaq...
Yasaq ömür yaşamaq!
yaxşı deyib o şair:
"Yasaq bir dildə yazmaq, qan ilə qan ovlamaq"