Çeçenistanın baş naziri Ramzan Kadırov bir daha jurnalist Anna Politkovskayanın ölümündə əli olmadığını deyib. Kadırovun sözlərinə görə, Politkovskaya onun yolunu kəsmədiyi üçün haqq-hesab çürütməyə əsas yox idi: «O, mənim yolumu kəsməyib. Əslində mənə kömək edib».
Kadırov əlavə edib ki, Politkovskaya onun atası – Çeçenistanın keçmiş prezidenti Əhməd Kadırov haqda pis nəsə yazıbsa, o vaxt onu ya məhkəməyə vermək, ya da haqq-hesab çəkmək olardı. Amma çeçenlər heç vaxt bu cür haqq-hesab çəkmirlər, xüsusən də qadınla.
Politkovskaya Çeçenistandakı vəhşiliklər haqqında yazdığı məqalələrlə daha çox diqqəti çəkirdi. Həmkarları və bir çox siyasətçilər onun ölümünü işi ilə əlaqələndirirlər.