Cənab Basesku bildirdi ki, Rumıniya Azərbaycanı Xəzər regionunda dost və tərəfdaş ölkə hesab edir: «Azərbaycan enerji təhlükəsizliyi baxımından Avropa bazarlarında rəqabətə davamlı ölkə ola bilər».
Rumıniya prezidenti ölkəsinin NATO-nun üzvü olduğunu və gələn il yanvarın 1-dən Avropa Birliyinin tamhüquqlu üzvünə çevriləcəyini və bu çərçivədə Azərbaycanla əməkdaşlığın davam etdirilməsində maraqlı olduqlarını da bəyan etdi. «Biz Avropada enerji təhlükəsizliyinə görə məsuliyyət daşıyan ölkəyə çevriləcəyik» - deyə, o, bildirdi.
Azərbaycan prezidenti İlham Əliyev isə dedi ki, Bakı Rumıniya ilə bütün sahələrdə əməkdaşlıq etmək əzmindədir: «Demək olar ki, müttəfiq ölkələrik. Əminəm ki, bir sıra layihələr çərçivəsində əməkdaşlığımız inkişaf edəcək».
Cənab Əliyev həmkarının Bakıya səfəri çərçivəsində bir neçə sazişin imzalanmasının nəzərdə tutulduğunu, bu sənədlərin əməkdaşlığın hüquqi bazasının daha da genişlənməsinə şərait yaradacağını bəyan etdi.
Ölkə başçısı NATO-ya inteqrasiya məsələsində Rumıniyanın Azərbaycana həmişə öz dəstəyini verdiyini və bu istiqamətdə Buxarestin təcrübəsindən istifadə edəcəklərini bildirdi. «Bu, ikitərəfli əməkdaşlığın mühüm istiqamətlərindən biri olacaq»-, deyə o, vurğuladı.