Oktyabrın 10-da axşam saatlarında yağan güclü leysan və dağlardan gələn sel nəticəsində Əli Bayramlı şəhərinə ciddi zyian dəyib. Şəhərin küçələrini, evlərin zirzəmilərini, uşaq bağçaları və orta məktəbləri su basıb. Bir neçə ev uçub, dəmiryol xəttinin və avtomobil yolunun bir hissəsi sıradan çıxıb. Orta məktəblərdə dərs davam etsə də, uşaq bağçalarının bəzisi işləmir. Elektrik enerjisinin isə yaxın saatlarda veriləcəyi gözlənilir.
Təbii fəlakətin vurduğu ziyanın qarşısını almaq üçün Baş nazirin müavini Abid Şərifov, Fövqəladə Hallar naziri Kəmaləddin Heydərov və Prezident Aparatının əməkdaşları Əli Bayramlıya gedib.
Əli Bayramlı Şəhər İcra Hakimiyyətində ümumi şöbənin müdiri Şahid Əfəndiyev deyir ki, Bakıdan gələn nümayəndə heyəti görüləcək işləri planlaşdırır. Küçə və zirzəmilərdən suyu çəkmək üçünsə ətraf rayonlardan əlavə texnika cəlb olunub.
Cənab Əfəndiyevin sözlərinə görə, dəyən ziyanın miqdarı və tələfat haqda dəqiq məlumat yoxdur. Bu haqda komissiya ilkin məlumatı oktyabrın 12-də açıqlaya biləcək. Hələlik dəqiqləşdirilə bilən məlumat belədir:
«Ona yaxın ev qəza vəziyyətindədir. Bir neçə ev uçub. Xeyli sayda mal-qara tələf olub».
Şəhər sakinlərinin sözlərinə görə, Əli Bayramlıda heç zaman belə güclü leysan olmayıb.