-
Qaratikanlının yolları bərbad vəziyyətdədir. Yağış yağanda kəndə gediş-gəliş dayanır".
«Qaynar xətt»ə zəng edən Qəbələnin Qaratikanlı kənd sakinlərinin giley-güzarı bitib-tükənmək bilmir. Deyirlər, bu kəndə gələn qonaq-qara bir də ayaq basmaq istəmir.
"NAMAZI İDMAN ZALINDA QILIRIQ"
«Çayın üzərində körpü olmadığına görə rayon mərkəzinə gediş-gəliş çətindir. 7 kəndin sakinləri bu çayın üstündən keçib gedirlər. Çayın bu tərəfindən o tərəfinə keçmək üçün üstünə taxta parçası, dəmir boru atırıq. Təkcə bizim kəndin 3 minə yaxın sakini var. O biri kəndlərin də sakinlərini nəzərə alsaq, indi gör bu çayın üzərindən gün ərzində nə qədər gediş-gəliş olur», bunu kənd sakini Nazim Əkbərov deyir.
«İnanclılar bayram namazını kənd məktəbinin idman zalında qılır».
Müsahibim həm də yollardan və kənddəki inzibati binalardan gileylənir:
"UŞAQLARI MƏKTƏBƏ BURAXMIRIQ"
«Yollar pis gündədir. Payız, qış gəldi, küçəyə çıxılası deyil. Çünki palçıq dizdən olur. Uşaqları da məktəbə buraxmırıq. Uşaq bağçasının, məktəbin binası dağılıb gedir. Mədəniyyət evinin qapısının açıq vaxtını sonuncu dəfə nə vaxt görmüşüksə, artıq unutmuşuq. Uzun illərdir ki, bərbad vəziyyətdə və qapısı qıfıllıdır. Hətta kənd icra nümayəndəliyinin öz binası da quş damına oxşayır».
Şəki rayon İcra Hakimiyyətindən «Qaynar xətt»ə bildiriblər ki, problemlər içərisində üzən bu kənd Tikanlıçay və Qaraçayın arasında yerləşir. Kənddə iki məktəb və bir uşaq bağçası var. Qəbələnin ətraf kəndlərinin abadlaşdırılması planına uyğun olaraq, kəndlər növbəli qaydada abad edilir. Tikanlıçayın da yollarının, kənddəki inzibati binaların təmiri, qaz, su, işıq xətlərinin yenilənməsi nəzərdə tutulsa da tikanlıçaylıları bu yaxınlarda sevindirmək mümkün olmayacaq. Çünki növbədə Tikanlıçaydan əvvəl hələ başqa kəndlər var.