-
"İsa Məsihin Mariya Maqdalena adlı gizli arvadı olub, həmin arvaddan da iki oğlu".
"Washington Post" yazır ki, bunu yeni çap edilmiş “The Lost Gospel” (İtirilmiş İncil) kitabının müəllifləri iddia edirlər:
Kanadanın York Universitetinin professoru Barrie Wilson və sənədli film rejissoru Simcha Jacobovici deyirlər ki, xristian peyğəmbərinin əsl kimliyi əsrlər boyu yalan məlumatlar və yozumlar içində gizlədilib:
“Vatikanın həmişə qorxduğu məsələ (Dan Brown-un “Da Vinçi kodu” əsərində yalnız şübhələndiyi məsələ) axır ki həqiqətə çevrilib üzə çıxdı”.
Kitab arami dilində yazılan və 1500 il yaşı olan əlyazmaya əsaslanır. Həmin əlyazma Britaniya Kitabxanasında tapılıb.
Heyvan dərisi üzərindəki həmin yazılar Britaniyaya1847-ci ildə gətirilib – Misirdəki kilsələrin birindən.
O zamanın alimləri əlyazmanı tədqiq etmiş və əhəmiyyətsiz eksponat kimi arxivə vermişdilər.
İsa Məsihin ailə qurması və arvadının uşaq dünyaya gətirməsi məsələsi məşhur Amerika rejissoru Martin Scorsese-nin 1983-cü ildə çəkdiyi “İsa Məsihin son günahı” adlı qalmaqallı filmində də əksini tapıb.
Dini mətnlərdə Mariya Maqdalena İsa Məsihin tərəfdarı, onun çarmıxa çəkilməsinin şahidi olan qadın kimi təqdim edilir.
Filmdə isə o, pis yola düşmüş qadındır, İsa Məsih onunla ailə qurur və onların övladları olur.
Amma bir çox ruhanilər və alimlər bu nəzəriyyəni, xüsusən də yeni kitab müəlliflərinin yazdıqlarını rədd edirlər.
Arizona Universitetində çalışan arxeoloq William G. Dever deyir ki, bu bir reklam tryukudur və müəlliflərini varlandıracaq, amma eyni zamanda bu, faktı təxəyyül məhsulundan ayıra bilməyən milyonlarla günahsız insanı məyus edəcək.
