-
Ukraynada keçirilən imla müsabiqəsi həmişə siyasi çalara malik olub.
Ölkə əhalisinin 1/3 hissəsi ukrain dilində danışmır, onlar üçün ana dili ya rus dilidir, ya da adına “surjik” deyilən rus və ukrain dillərinin qarışığı.
2000-ci ildən bəri keçirilən müsabiqə rəsmən “Milli Birlik uğrunda Ümumukrayna İmla Müsabiqəsi” adlanır.
Bu il müsabiqənin siyasi çaları daha açıq hiss olunur. Ukrayna ordusu əsasən rusdillilərin yaşadığı şərq bölgələrində separatçılarla üz-üzədir.
Müsabiqəni keçirən Milli Radio Şirkəti bildirib ki, bu il qaliblərə verilməli olan pul mükafatları separatçılarla döyüşən Ukrayna ordusuna yönəldiləcək.
Başqa sözlə, builki müsabiqə həm təşkilatçılar, həm də iştirakçılar üçün sırf Ukraynanın ərazi bütövlüyünə dəstək nümayişidir.
İmla müsabiqəsi Ukrayna dili günü ərəfəsində keçirilir və kifayət qədər populyardır. Ötən il müsabiqəyə 13 min nəfər qatılıb.
180 sözlük mürəkkəb mətn radiodan oxunur və iştirakçılar onu yazıya köçürüb müsabiqə təşkilatçılarına yollamalıdırlar.
Kiyevdə yerləşən Ukrayna Mədəniyyəti Mərkəzinin rəhbəri Svitlana Dolesko müsabiqədə hər il iştirak edir. Bu il o, 7 səhv buraxıb. Əsasən durğu işarələri ilə bağlı.
O deyir ki, imlanı bircə dənə də olsun səhv buraxmadan yaza bilənəcən müsabiqəyə qatılmağa davam edəcək.
Dil - Ukraynada çox həssas məsələdir. O qədər həssas ki, hakimiyyətə gələn qərbyönümlü siyasətçilərin ilk işlərindən biri parlamentdə qanun qəbul edib rus dilini dövlət dili statusundan məhrum etmək olmuşdu.
Bu, ölkənin şərqində narazılıqla qarşılandığı üçün ölkə rəhbəri onu imzalamaqdan imtina etmişdi.
Digər tərəfdən, Rusiya həmin qanundan bir bəhanə kimi istifadə edib rusiyayönümlü separatçılara dəstək verməsini əsaslandırmağa çalışmışdı.