Keçid linkləri

2016, 09 Dekabr, Cümə, Bakı vaxtı 17:31

-

Elmar Şahmar

ŞEİRLƏR

***

...göydələnlər çox maraqlı görünər

intihar etmək üçün

alçaldılmış insanların yer seçimində...

...öncə yaşamaq ümidi intihar edər

özlərindən və hər şeydən əvvəl

ölümə doğru uçanların içində...

...geri dönməz bu dünyadan gedənlər

heç ruhları da qayıtmaz daha

uçub gedər uzaqlara durnaların köçündə...

***

Nə keçmişi yada salıb

qəlb sıxmalı havadı... -

Buludlara baxıb-baxıb

darıxmalı havadı...

...bu gün səninçün ilk dəfə

əsgər kimi ağladım,

bir kimsə görməsin deyə

yastığı qucağladım.

bu gün səninçün ilk dəfə

buludlar da ağladı,

Yağış yaşıl yarpaqların

tozunu sığalladı...

mənə qalsa, sənin üçün

darıxmaqdan ölərdim,

məni arzular qorudu,

məni ümid saxladı...

Nə gözlərə baxıb-baxıb

əl tutmalı havadı... -

Sevgidən başqa hər şeyi

unutmalı havadı...

* * *

Gözlər - baxılmağadı,

əllər - tutulmağa.

Sevgi - əzab çəkməyədi,

insan - unudulmağa...

Yanaqlar - oxşamağadı,

dodaqlar - öpülməyə.

Qulaqlar - pıçıldamağadı,

saçlar - ah səpilməyə...

Torpaq - ona qayıtmağadı,

dünya - qonaq gəlməyə.

Həyat - bəzən yaşamağadı,

bəzən ölməyə...

Ayrılıqlar şahı

Səndən əvvəl kimlər olub - bilirsən?

Bilirsənmi neçə qızın ahıyam?

Bilməz nədir: ürəyim qəm, gözüm nəm,

Mən çoxdanın ayrılıqlar şahıyam.

Məni kimlər qarğışlayıb - bilirsən?

Bilirsənmi neçə ürək daş olub?

Neçə qızın daşa dəyib sevgisi,

Neçəsinin gül yanağı yaş olub?

Nə qədər göz yollarıma dikilib,

Nə qədər qız yol gözləyib - yorulub?

Bilirsənmi, səndən əvvəl neçəsi

Məni sevib, sevib, sevib yorulub?

Sən də onlardan birisən - bilirsən?

Məni sevdin axı nəyçün və niyə?

İstəyirsən mənimçün öl - inan ki,

Şah olandan inanmıram sevgiyə.

Mənimki vaxt keçirməkdi - bilirsən,

Bilirsənmi neçə vaxtdı daşam mən?

Mən çoxdanın ayrılıqlar şahıyam,

Eşqə dolu, ayrılığa boşam mən.

Darıxdığım

Ay yuxudan durmamış

surətinə baxdığım,

Sənin üçün darıxdım,

necəsən darıxdığım?

Bir de görüm hardasan:

evdə, yolda, küçədə?

Səhərin qoynundasan,

ya qalmısan gecədə?

Bu səhər bu boz şəhər

geyinib solğun libas,

Sən yağış ol, mən bulud,

gəl özünü məndən as.

Demə gələ bilmərəm,

bəhanədi tıxaclar,

Yolunu gözləyirik:

külək, mən və ağaclar…

Boylanıram keçmişə,

arxada qalıb illər,

Səndən mənə xatirə:

mesajlar və şəkillər.

Düz yolunun üstdəyəm,

əllərimdə çiçəklər…

Uzaqdan bir səs gəlir:

gözlə, gəlməyəcəklər…

Yenə gəlir: göylərə

bax bir dənə arzu tut,

Arzu tutdum gələsən,

gözünü sıxdı bulud.

Danış da, bu sənmisən,

yoxsa yağış başladı?

Ümidlərim titrədi,

baxışlarım daşladı.

Ah da var sinəmdəki

dağların arasında,

Gəlsən, yaş da görərsən

gözümün qarasında.

Ay gözümün yaşıyla

yollarına axdığım,

Bəsdi yollara baxdım,

hardasan, darıxdığım?...

Günün bütün mövzuları

XS
SM
MD
LG