-
Avropa Birliyi vətəndaş cəmiyyətinin inkişafı sahəsində Azərbaycanla işi davam etdirəcək. “Trend” xəbər verir ki, oktyabrın 22-də jurnalistlərə qurumun Azərbaycandakı nümayəndəliyinin rəhbəri Malena Mard belə deyib.
Onun sözlərinə görə, Avropa Birliyinin Azərbaycanın vətəndaş cəmiyyəti və dövlət strukturları ilə təmasları daimidir və bu, həm AB, həm də Azərbaycan üçün vacibdir:
"İstənilən ölkədə vətəndaş cəmiyyətinin mövcudluğu çox vacibdir və Azərbaycan da istisna deyil".
M.Mard qeyd edib ki, Avropa Birliyi Azərbaycan prezident İlham Əliyevin “NİDA” vətəndaş hərəkatının keçmiş üzvlərinə şamil olunan sonuncu əfv sərəncamını alqışlayır:
"AB belə addımların davamlı olacağına ümid edir".
İlham Əliyevin oktyabrın 17-də 80-dən artıq məhkumun əfv olunması ilə bağlı sərəncam imzalayıb. Əfv olunanlar arasında “NİDA” vətəndaş hərəkatının üç keçmiş üzvü - Şahin Novruzlu, Elsevər Mürsəlli, Bəxtiyar Quliyev, eləcə də QHT rəhbəri Həsən Hüseynli var.
