-
Sentyabrın 24-də Bakıda “Azərbaycan Televiziya və Radio Verilişləri” Qapalı Səhmdar Cəmiyyətinin (QSC) təşkilatçılığı ilə “TEFİ-Sodrujestvo” IV Beynəlxalq televiziya festivalının açılış mərasimi keçirilib.
Bakı şəhər Mədəniyyət və Turizm İdarəsinin yaydığı xəbərə görə, tədbiri açan Rusiya Televiziya Akademiyası Fondunun baş direktoru Etere Leviyeva festivalın iştirakçı ölkələrin xalqları arasında dostluq münasibətlərini daha da möhkəmləndirəcəyinə əminliyini ifadə edib.
E. Leviyeva bildirib ki, festivalda MDB-nin 11 ölkəsinin televiziya kanallarından tanınmış rejissorlar, aparıcılar və mütəxəssislər iştirak edirlər.
MDB ölkələri televiziyalarının işlərinin təqdimatı məqsədilə keçirilən bu festivalda bir çox telefilmlərə baxış olacaq.
Festival çərçivəsində Belarus, Gürcüstan, Qazaxıstan, Ukrayna, Moldova və digər ölkələrin televiziya filmlərinə də baxış keçiriləcək.
