Ukrayna bildirir ki, son 24 saatda atəşkəsin pozulması nəticəsində 8 Ukrayna əsgəri yaralanıb.
Ukraynanın Milli Təhlükəsizlik Şurasının sözçüsü Lysenko sentyabrın 24-də deyib ki, rusiyapərəst yaraqlılar atəşkəsi pozmaqla Ukrayna ordusunu cavab atəşi açmağa vadar etmək istəyir.
Rusiyapərəst yaraqlılar isə Donetskin atəşə tutulduğunu və iki mülki şəxsin öldüyünü bildirir.
Sentyabrın 20-də əldə olunmuş razılığa görə tərəflər cəbhə xətti boyunca eni 30 km olan bufer zonası yaratmalıdırlar və artilleriyanı hərə 15 km geri çəkməlidir.
Sentyabrın 23-də yaraqlılar daş kömür mədənində kütləvi məzarlıq tapdıqlarını bildiriblər. Rusiyapərəst yaraqlılar iddia edirlər ki, məzarların birində tapılan 4 meyitin üzərində işgəncə yerləri var.
Yaraqlılar burda vaxtilə Ukrayna ordusunun qərarlaşdığını deyirlər.
Ancaq Lysenko və Milli Qvardiya bu yerdə ordu hissələrinin heç vaxt olmadığı bildirir. Lysenko yaraqlıların iddialarını təxribat adlandırır.