-
ABŞ müdafiə naziri Chuck Hagel sentyabrın 6-da Gürcüstana gedir.
NATO-nun Böyük Britaniyada keçirilən sammitindən sonra Hagel Tbilisiyə yollanır.
Gürcüstanın Müdafiə Nazirliyi bildirib ki, Hagel ölkə rəsmiləri ilə İŞİD-ə qarşı mübarizədə onların verə biləcəkləri köməyi müzakirə edəcək.
Gürcüstan müdafiə naziri Irakli Alasania «Reuters»ə bildirib ki, Hagel-in səfəri ABŞ-ın Gürcüstana dəstəyini nümayiş etdirir:
«Biz böyük səbirsizliklə ABŞ müdafiə nazirinin Gürcüstana səfərini gözləyirik. Hər şeydən əvvəl bu, ABŞ-ın Gürcüstanın arxasında durduğunun nümayişi və əminliyidir. Döyüşlərdə çiyin-çiyinə vuruşan bizim əsgərlərimiz arasında böyük inam var və yüksəksəviyyəli səfər də bunu göstərir».
Alasania həm də bu səfərin ABŞ-la müdafiə sahəsində əlaqələrin dərinləşəcəyinə səbəb olacağını gözləyir. O, Ukrayna rəhbərliyi ilə rusiyameylli separatçılar arasında bağlanan razılaşmaya da münasibətini bildirib:
«Hamımız razıyıq ki, atəşkəsə ehtiyac var. Əlbəttə, bizim Rusiya ilə atəşkəsə etibar etməklə bağlı kiçicik təcrübəmiz var. Rusiya 2008-ci il müharibəsindən sonra Avropa Birliyi və Gürcüstanla atəşkəs imzalayandan sonra da bunu pozmağa meyllidir. Atəşkəslə bağlı razılaşma hələ də yerinə yetirilməyib və Rusiya Gürcüstanın 20 faiz torpağını işğal altında saxlayır».