-
İslamabadda hökumət əleyhinə etiraz aksiyasına rəhbərlik edən pakistanlı ruhani deyir ki, baş nazir Nawaz Sharif 48 saat ərzində istefa verməsə, ölməyə hazırdır. Tahir-ul-Qadri avqustun 25-də parlamentin qarşısında minlərlə etirazçıya ağ kəfən göstərib və deyib ki, bu kəfən ya özünə, ya da Sharif hökumətinə qismət olacaq.
Müxalifətdən olan siyasətçi Imran Khan-ın qoyduğu ultimatumun vaxtı da bitib.
Sharif istefa verməzsə, Qadri və Khan-ın nə edəcəyi bəlli deyil, ancaq onların, tərəfdarlarını parlamentə və ya Sharif-in ofisinə girməyə çağıracağı sarıdan narahatlıq var. Bu halda həmin binaları qoruyan əsgərlərlə qarşıdurma yarana bilər.
Avqustun 15-dən minlərlə etirazçı İslamabadda aksiya keçirir.