«Şərq» qəzetindəki «Münaqişənin həlli yubanacaq» başlıqlı məqalədə müəllif yazır ki, Cənubi Qafqaz regionunda yaxınlaşmaqda olan seçki illəri Dağlıq Qarabağ münaqişəsinin həllini də dondura bilər. Siyasi ekspertlər bu fikirdədir ki, 2007-ci ildə Ermənistanda gözlənən parlament, 2008-ci ildə isə Azərbaycandakı prezident seçkiləri münaqişənin həllini arxa plana keçirəcək. Müəllifin həmsöhbəti Ədalət Partiyasının sədri İlyas İsmayılov da adətən seçki illərində münaqişələrin həlli istiqamətində durğunluq yaranması fikrini təsdiqləyir. Bununla belə, o, bu qənaətdədir ki, hər hansı siyasi prosesin başlayıb bitməsini gözləmədən Azərbaycan özü Qarabağ probleminin həllinə başlamalıdır. İlyas İsmayılovun fikrincə, Dağlıq Qarabağ münaqişəsinin həllini beynəlxalq təşkilatların üzərinə atıb, vaxtaşırı hansısa ekspertlərin fikrinə arxalansaq, onda problem əbədi həll olunmamış qalacaq.
«Yeni Müsavat» qəzetinin əməkdaşı yazır ki, hakimiyyət daxilindəki qruplaşmaların arasında gedən «soyuq müharibə» getdikcə təhlükəli həddə çatır. Söhbət nəzarətində qeyri-leqal silahlı qruplaşmalar olan hakimiyyət təmsilçilərindən gedirsə, təbii ki, bu ziddiyyətlərin dərinləşməsi təkcə İlham Əliyev üçün deyil, dövlət və cəmiyyət üçün də çox təhlükəlidir. AXCP sədrinin müavini Qulamhüseyn Əlibəyli baş verənləri hakimiyyət daxilində uzun müddətdən bəri davam edən ziddiyyətlərin üzə çıxması kimi dəyərləndirir. Ümid Partiyasının sədri İqbal Ağazadə isə hesab etmir ki, hakimiyyətdaxili qruplar İlham Əliyevi devirmək üçün mübarizə aparırlar: «Bu mübarizə əslində, tamam başqa hədəflər uğrunda gedir. Yəni artıq hər kəs özünün stabil hakimiyyət dönəmini, heç kəsdən asılı olmayan qrup lideri dövrünü yaşamaq istəyir».
«525-ci qəzet» xəbər verir ki, Yeni Azərbaycan Partiyasının Siyasi Şurasının üzvü, millət vəkili Aydın Mirzəzadə «Realnıy Azerbaydjan» qəzetini məhkəməyə verib. Buna onun adından ötən həftənin sonları sözügedən qəzetdə Daxili İşlər naziri Ramil Usubov haqda dərc edilən fikirlər səbəb olub. Həmin açıqlamada Aydın Mirzəzadənin adından Ramil Usubovun DİN sistemindəki hadisələrlə bağlı parlamentə hesabat verməsi tələb olunurdu. Millət vəkili isə belə fikirlər səsləndirmədiyini iddia edir. «Gündəlik Azərbaycan» qəzetinin şef-redaktoru Şahvələd Çobanoğlu isə deyir ki, qəzetdə Aydın Mirzəzadənin fikirləri olduğu kimi dərc edilib.
«Korrupsiyanın kökünü kəsmək üçün Dövlət Yol Polisi İdarəsində (DYPİ) aparılmış islahatlardan nümunə götürərək bu üsuldan istifadə etmək lazımdır». «Şəffaflıq-Azərbaycan» Təşkilatının icraçı direktoru Rəna Səfərəliyeva «Xalq Cəbhəsi» qəzetinin əməkdaşı ilə söhbətində belə deyib. Xanım Səfərəliyevaya görə, DYPİ sistemində korrupsiyanın qarşısını almaq üçün düzgün yanaşma üsulundan istifadə edilib. Birincisi, sistemin işçilərinin maaşı kəskin şəkildə qaldırılıb. İkincisi, onlara təlim-treninq kursları keçirilib. Üçüncü məqam isə, sistemli islahatların ararılmasıdır. Sonuncu - dördüncü məqam isə cəza mexanizmlərinin işlənilməsi və istifadə olunmasıdır. Rəna Səfərəliyeva onu da bildirib ki, hazırda siravi vətəndaşların nöqteyi-nəzərində daha çox korrupsiyalaşmış sahə məhkəmə sistemidir. Əhali hakimlərin rüşvət istəməsi və məhkəmə qərarlarının icra edilməməsiylə üzləşirlər. İkinci yerdə isə bələdiyyələr və yerli icra hakimiyyəti strukturlarıdır. Şikayətlərin əsas məzmunu torpaq paylanması və tikinti üçün icazə verilməməsiylə bağlıdır.